Saturday, October 28, 2006

وجئت مرة

وجئت مرة ..

اليوم أكملت إليكم عامي السابع والعشرين ...
وأتممت عليكم سنيني ...
ورضيت لكم حياتي حياة ... فهنيئا لي بكم ...
لم أسعي يوما بأن أضع عامي السابع والعشرين أمام عيني بالدهشة مثلما يقف الآن حانقا.. واعتدت بأن ألبس حذائي البوط .. وبنطلوني الجينز الممهد النهاية فوق الركب .. والقميص الذي اشتد يوما بسبع زراير ليكون جديدا – مالبث أن صار مهترئا تحت الباط

فتحت الباب البني بالعين السحرية التي لا تجعلك تشاهد من بالباب – لا أعلم ما مدي سحريتها – ثم أهبط درج السلم بطريقة أقل بطئ من المعتاد عليه .. انير لمبة حوش البيت .. وأفتح الباب الحديدي .. وأخرج .. وأمشي في طريقي العادي .. ثم أذهب الي كوبري 6 أكتوبر المعروف بزحامه الشديد ... وأضع رأسي علي يدي وأقول
انا عندي 27 سنة دلوقتي:
وأرمي بنفسي في النيل بطريقة مضحكة فانتازية فارسية كومبولوزونية .. ولم أشا ان أري احدا قبل أن اكون بهلونا في قفزي الأخير .. وكنت أقول :
- عادي .. مكنتش عايز حاجة .. هههه
ثم أبدأ في التجهيز لاستقبال طرائف جديدة .. واحاول أن اخرج للحظات لأحصل علي نفس .. واسارع في الهبوط مرة أخري سريعة ...
وتتكرر المرات .....
وأغرق .. لأول مرة أغرق .. لم يدر بخلدي يوما أن أغرق .. وهذه هي اولي طرائفي الجديدة بأن أقابل ( ملكين حلوين ) يرتديان التي شيرت الأبيض وبنطلون جينز ناصع البياض مثل إعلانات اريال التلفزيونية و نظيفة – غريبة لم أكن أتصور أن ملابسهم بيضة وكنت فاكرها هتكون مليانة تراب من شغل كل يوم وتحت الأرض .. ناس غريبة – ثم يبدآن الحديث وكلا منهما يسند دوره لغيره .. من سيسأل ؟ .. فقال الأول :
- ازيك
وقال الآخر :
- ايه ؟
ونظرا لبعضهما .. و ضحكا ضحكا هستريا .. يتوقفا فجأة عن الضحك .. ويستانف واحد منهما الحديث بالإشارة .. فلم افهم ..
وبهذا الزمن المتقطع الذي أشعر به لأول مرة والذي أصابني بملل لأني لم أتصور أن الملكين ( ايقاعهم واقع ) وأنا في صمتي أتذكر عامي السابع والعشرين ومجموعتي القصصية التي تركتها وحيدة دون نشر .. هل سيحصل عليها صديقي ليعطيها لمحمد هاشم بميريت لتنشر في سنويتي ..


ملحوظة : نسيت أن اقول الأحداث المهمة .. تتعوض .
باسم شرف

اكتوبر 2006

Friday, October 27, 2006

طارق امام ومدونته الجديدة



النهاردة عيد ..

طارق إمام عمل مدونة

وطارق زي ماهو روائي وقصاص مهم انسان مهم

طارق صاحب رواية شريعة القطة2003

شارع آخر لكائن 1997

وطيور جديدة لم يفسدها الهواء سنة 1995

ثم صدر له قصص للاطفال اسمها ملك البحار الخمس عام 2000

وعلي فكرة طارق ماسك باب في مجلة الاذاعة والتلفزيون اسمه شباب يجن وهو من رجال الديسك في المجلة

ياجماعة طارق كاتب مهم قوي

واللي عايز يعرف طارق يتابع مدونته الجديدة

http://tareqemam.blogspot.com/

Wednesday, October 25, 2006

ما كتب عن كومكستنا في الف السورية

كتبت مجلة الف السورية مقالا عن مشروع الكوميكس الخاص بيني وبين الرسام مجدي الشافعي والكلام اللي كتبوه كبير ولكن يوضح استيعاب الشعب السوري الثقافات الجديدة بطرق تعبيرها واحترام المجلة كونها تخصص المقال الرئيسي فهذا احترام لنا واحترام لهم

انا اتخضيت لما شفت الموضوع كده
غريبة قوي
علي الرغم من بداية انفتاح فن الكوميكس في مصر الا انه ما زالت مشاكل تحوطنا من كل صوب وتجاه
ويبقي الفن والفنانين
تحية الي مناضلي فن الكوميكس في مصر والوطن العربي
وهنا احب ان اشكر الفنان الدكتور مجدي الشافعي عن استيعابه للافكار وابداعه واضافاته الدائمة
ودا لينك ما كتب هناك
http://aleftoday.net/modules.php?name=News&file=article&sid=970

Sunday, October 22, 2006

الله يرحمه

ومات عمي

Saturday, October 21, 2006

شكرا رمضان

رمضان قرب يخلص خلاص
علي الرغم ان ليه طعم خاص من كل شهور السنة الا انه بيعدي بسرعة عن اي شهر
يمكن عشان احنا مش متعودين نفهم ايامنا بسهولة وده الشهر الوحيد اللي فهمين هو عبارة عن ايه

لكن والله بعودة يارمضان

Wednesday, October 18, 2006

سهرة شعرية

دعوة يوم الجمعة اللي جاية علي طول
لحضور سهرة شعرية مع الشاعر عبد المنعم حسين في مسرح النهر بساقية الصاوي
علي فكرة الدعوة عامة

ببلاش يعني
والشاعر عبد المنعم حسين من الناس اللي قريبن ليا ومن قلبي لروحه المرحه وكتابته الجميلة
علي فكرة الاستاذ عبد المنعم حسين فكرينه ؟
كاتب الكوميكس المعروف
اللي كان بيكتب زمان في بلية العجيب بالمؤسسة العربية الحديثة وكان بيكتب في مجلة كاركتير
ومن الناس اللي اسسوا فكرة كوميكس للكبار من زمان

ويارب السهرة الشعرية تعجبكم
يوم الجمعة
محدش ينسي

ها ؟

اشكر داليا زيادة


النهاردة فوجئت بكلام كبير خلاني قاعد ساكت ومبلم لان الكلام اللي اتقال من حد بيفهم وعشان كده احرجني

وجدت الكاتبة والمترجمة المصرية داليا زيادة كتبت كلام عني فقعدت ساكت قدام الشاشة فترة كبيرة

علي العموم اشكرك يا داليا علي كلامك الكبير ويارب اكون عند حسن ظنك دايما

ودا اللينك اللي عليه الكلام

http://daliaziada.blogspot.com/

والله انا حطتيت الكلام هنا عشان اشكرها وكنت مكسوف اني احط كلام عني لاني بتكسف

لكن شكرا ياداليا

Sunday, October 15, 2006


عارفين مين ده ؟
دا اسماعيل ياسين سنة 2005
تفتكروا لو كان موجود كان هيعمل ايه ومين هينتج له فيلمه
انا اعتقد هو كان هيعمل زي افلامه اللي غالبا مش بتعجبني باستظرافها
الا اني اعتقد انه هيخلي السبكي ينتجله وكان هيسميه اسماعيل ياسين مع اللمبي
او يسميه لوحده اسم جديد .. سمبي .. وكان ربنا هيكرمه ويعمل افلام تانية وتجيب مليون وشويات
ربنا معاه بقي ونسيبه ياكل عيش هو واللي معاه
بس ايه رايكو في اسماعيل دياب
كله عند الله
ربنا معايا

Wednesday, October 11, 2006

خليها علي الله ياعمر



مبروك لاصالة عن احلي اغنية سمعتها في الفترة الاخيرة وهي خليها علي الله
الاغنية كتابة الشاعر عمر طاهر والحان رامي صبري

اول ما سمعتها مصدقتش اني اسمع اغنية حقيقية مفهاش زيف ولا كدب
حقيققية قوي
حبيتها

شكرا ياعمر علي الاغنية الهايلة وشكرا لرامي علي الالحان وشكر لاصالة علي الغناء
كفاية الجملة اللي بيقول فيها (الكون ده كله يمكن .. وانت بس اللي اكيد ) جامدة قوي وباقي الاغنية حلوة قوي
عمر طاهر من اهم الشعراء المهمين واللي كل ما يعمل ديوان الناس تقراه المثقفة والعاديين لانه بيقرب منهم وبيكتب شعر حقيقي
كتب : مشوار لحد الحيطة ... لابد من خيانة.... عرفوه بالحزن ... وضع محرج
واخيرا كتب كتاب اللي كسر الدنيا اسمه (شكلها باظت)

عمر طاهر كمان بيكتب دراما وشارك في كتابة حلقات تامر وشوقية وترجم روايه لباولو كولهو ( بالقرب من نهر بيدرا جلست وبكيت )

ياجماعة عمر بيكتب كتابة مختلفة

انا هاديكم اللينك بتاعة اغنية خليها علي الله حملوها ونزلوها

http://www.6rbtop.com/song.php?album_id=1113&artist_id=1030

ابقو ادعولي
وادعو لعمر ورامي واصالة

Thursday, October 05, 2006

عملي في تامر وشوقية



شكرا الي كل من كتب عن مسلسل تامر وشوقية الذي يعرض في عدة قناة الاولي المصرية والفضائية المصرية والمستقبل والراي والاوربت وmbc

انا قررت ان اشكر كل من كتب سواء بالسلب او بالايجاب واخيرا
انا احب ان اشكر الكاتب والصحفي طارق امام الذي كتب في عدد 7اكتوبر 2006
بمجلة الاذاعة والتلفزيون ....بعنوان كوميديا رمضانية بالتوابل الامريكية ( الخلطة السرية في تامر وشوقية )
وعنوان جانبي ( كتابة المسلسل استغرقت عاما كاملا ) فعلا خدت مجهود كبير في الكتابة ياطارق
انا اشكرك علي الموضوع
واشكر ايضا الصحفي وائل الجندي في صفحة شاشة في مجلة الاذاعة والتلفزيون ايضا ولكن اقول له انتظر باقي الحلقات
اما الاستاذ يوسف دياب الذي كتب في جريدة عين تامر وشوقية الاصل والصورة احب ان اقول له ان شريف عرفة اسمه مش موجود علي التتر ومعظم اسماء الكتاب غلط مفهاش غير واحد بس اللي صح ............معرفش جبتها منين وهي موجودة تحت في اخر المدونة وثالثا احب ان اقول لك ان مسلسل احمد اتجوز مني مختلف عن تامر وشوقية اصلا هو عبارة عن ميني كوميدي اما تامر وشوقية عبارة عن ست كوم وكلاهما فرومات معروفة عالميا وكلاهما كوميدي لكن ده نوع وده نوع
اما رايك انا احترمه جدا


واشكر الكاتب محمد خير في جريدة الدستور الذي كتب كلاما موضوعيا واشكر اسلوبه الجميل
ورايك ايضا احترمه
واشكر كل من كتب عن المسلسل واشكر جميع فريق العمل من كتاب ومخرج وممثلين
احب ان اسال الاستاذ محمد الرفاعي الذي كتب في مجلة صباح الخير ما علاقة مسلسل تامر وشوقة بمسلسل الاصدقاء
تامر وشوقية مسلسل بين عائلتين اما الاصدقاء فهو باين من اسمه انه بين الاصدقاء

والذي لايعرف فريق الكتابة ( عمرو سمير عاطف ،وائل حمدي ، محمد حماد ، باسم شرف ، تامر عبد الحميد ، محمد اسماعيل ، وليد خيري ، عمر طاهر ،محمد سليمان عبد الملك ، محمد فتحي ، ولاء شريف ، مشيل نبيل ، براء، احمد خالد )
والمخرج هو اسامة العبد والممثلين احمد الفيشاوي ومي كساب ورجاء الجداوي ولطفي لبيب وجمال اسماعيل واحمد مكي ومحمد شاهين وانجي وجدان ..........ومجموعة من الضيوف

وشكرا لهم جميعا

ما كتب في هذه المدونة يعبر عن راي صاحب المدونة

اشترك في كتابة الحلقات الخاصة بي فريق عمل مكون من ثلاثة كتاب
محمد حماد وتامر عبد الحميد وباسم شرف