Saturday, October 28, 2006

وجئت مرة

وجئت مرة ..

اليوم أكملت إليكم عامي السابع والعشرين ...
وأتممت عليكم سنيني ...
ورضيت لكم حياتي حياة ... فهنيئا لي بكم ...
لم أسعي يوما بأن أضع عامي السابع والعشرين أمام عيني بالدهشة مثلما يقف الآن حانقا.. واعتدت بأن ألبس حذائي البوط .. وبنطلوني الجينز الممهد النهاية فوق الركب .. والقميص الذي اشتد يوما بسبع زراير ليكون جديدا – مالبث أن صار مهترئا تحت الباط

فتحت الباب البني بالعين السحرية التي لا تجعلك تشاهد من بالباب – لا أعلم ما مدي سحريتها – ثم أهبط درج السلم بطريقة أقل بطئ من المعتاد عليه .. انير لمبة حوش البيت .. وأفتح الباب الحديدي .. وأخرج .. وأمشي في طريقي العادي .. ثم أذهب الي كوبري 6 أكتوبر المعروف بزحامه الشديد ... وأضع رأسي علي يدي وأقول
انا عندي 27 سنة دلوقتي:
وأرمي بنفسي في النيل بطريقة مضحكة فانتازية فارسية كومبولوزونية .. ولم أشا ان أري احدا قبل أن اكون بهلونا في قفزي الأخير .. وكنت أقول :
- عادي .. مكنتش عايز حاجة .. هههه
ثم أبدأ في التجهيز لاستقبال طرائف جديدة .. واحاول أن اخرج للحظات لأحصل علي نفس .. واسارع في الهبوط مرة أخري سريعة ...
وتتكرر المرات .....
وأغرق .. لأول مرة أغرق .. لم يدر بخلدي يوما أن أغرق .. وهذه هي اولي طرائفي الجديدة بأن أقابل ( ملكين حلوين ) يرتديان التي شيرت الأبيض وبنطلون جينز ناصع البياض مثل إعلانات اريال التلفزيونية و نظيفة – غريبة لم أكن أتصور أن ملابسهم بيضة وكنت فاكرها هتكون مليانة تراب من شغل كل يوم وتحت الأرض .. ناس غريبة – ثم يبدآن الحديث وكلا منهما يسند دوره لغيره .. من سيسأل ؟ .. فقال الأول :
- ازيك
وقال الآخر :
- ايه ؟
ونظرا لبعضهما .. و ضحكا ضحكا هستريا .. يتوقفا فجأة عن الضحك .. ويستانف واحد منهما الحديث بالإشارة .. فلم افهم ..
وبهذا الزمن المتقطع الذي أشعر به لأول مرة والذي أصابني بملل لأني لم أتصور أن الملكين ( ايقاعهم واقع ) وأنا في صمتي أتذكر عامي السابع والعشرين ومجموعتي القصصية التي تركتها وحيدة دون نشر .. هل سيحصل عليها صديقي ليعطيها لمحمد هاشم بميريت لتنشر في سنويتي ..


ملحوظة : نسيت أن اقول الأحداث المهمة .. تتعوض .
باسم شرف

اكتوبر 2006

28 Comments:

At 10/28/2006 11:28 AM, Blogger كراكيب نـهـى مـحمود said...

اولا - كل سنة وانت طيب
ثانيا - شكرا لانك عرفتني هعمل ايه السنة الجاية لما اكمل ال27
ثالثا- يا ريت صحبك وهو بيدي هاشم روايتك علشان تتنشر في سنويتك
يساله اخبار روايتي اللي عنده ايه
رابعا - بوست جميل اوي بس انا مصدقه ان الملكين لابسين افرول ازرق ومترب
تحياتي وعقبال ميت سنة لحد ما توصل للمحيط الهادي وتستسلم كده لامواج شاطئه وتسحبك جواه وتحكي لك سره

 
At 10/28/2006 1:36 PM, Blogger abdallah ahmed , عبدالله احمد said...

happy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthdayhappy birthday

 
At 10/28/2006 2:39 PM, Blogger باسم شرف said...

عزيزتي كراكيب

شكرا
اذا وجدت شخصا اخر غيرنا يخبر هاشم ماذا نصنع من اجل ان تنشر اعمالنا باحترام
ياريت تبلغيني

وانتي طيبة بس كان عيد ميلادي من فترة


عزيزي عبدالله الجميل
شكرا

وانت طيب يامعلم
بس نسيت اقول ان عيد ميلادي من فترة

 
At 10/28/2006 4:29 PM, Blogger شيماء زاهر said...

البوست جميل أوي ، عارف إنت الشعور إللي ممكن يجيي للواحد إنه من فترة ما قراش حاجة حلوة كده..

إن شاء الله السنة الجاية (نفس ميعاد البوست ده) يكون كتاب ميريت طلع..أصل أنا جربت الشعور ده السنة إللي فاتت..للحظة حتشوف 6 أكتوبر فاضي حتى لو كان زحمة موت..و يبقى نفسك تاخد كده النيل بالحضن...بس من بعيد لبعيد طبعا!
بس حتى السنة الجاية حيكون بدري على موضوع لملكين..أنا عارفه إنهم جيجوا حيجوا..بس همه فاضيين يعني؟ مش لاقيين حد غيرك وألا إيه؟

:)

 
At 10/28/2006 5:13 PM, Blogger طارق إمام said...

حبيبي باسم
بالنسبة لكتاب ميريت ما تقلقش .. اعتبر نفسك عايش, أنا سوف أتكفل بالمسألة و مصاريف النقاد
بالنسبة للسبعة و عشرين عاما جربتها من سنتين.. حاجة كدة زي شكة الدبوس
بالمناسبة هاشم شخصيا عنده رواية متعطلة و بيتحايل على نفسه علشان ينشرها, و آخر مرة اتخانقو سوا و عور نفسه
بعيدا عن الهزار : بوست بديع و شجي و لمسني ..انت قريتهولي قبل كده و دي فرصة اني أقول رأيي فيه كتابة..نص هو ضفيرة من شعر رائق و نثر دافق
أخيرا : انت وحشتني جددددددا

 
At 10/29/2006 1:05 AM, Blogger باسم شرف said...

عزيزتي شيماء
انتي بلا شك كاتبة ومبدعة لذلك كان شعورك بالكتابة حي

ويارب تصدق الرؤية بنشر كل الكتب الحزينة اللي عند هاشم
لان الواحد هيفكر اكتر من مرة قبل ما ينشر

وابقي خلي حد يقوله ينور لمبة الحوش عشان تقدر تطلع عنده


طارق باشا امام

لما يكون الكلام جي من واحد عبقري زيك اكيد بطمن .. والله يابني هما لسة مش فاهمين انت بتعمل ايه ولا عارفين القوالب الادبية في الكتابة
وهتعرف كلامي لما تترجم ادبك للغات هتلاقي برة كلام تاني
هاعتمد عليك يامعلم في المرمطة لمجموعتي القادمة عند هاشم في سنويتي
قشطة ؟

 
At 10/29/2006 2:28 AM, Anonymous Anonymous said...

كل سنة وانت طيب

بعد ما عديت ال27 سنة بكتير أقدر أقول لك
اعمل اللى بعده و اللى بعده
انت فنان و لك ابداعك الخاص
ماتقفش عند حاجة
و كل ما ح تنو اكتر كل ما الناس تسعى ورا شغلك
ربنا يوفقك و من تانى
كل سنة و انت طيب
مجدى الشافعى

 
At 10/29/2006 3:04 AM, Blogger باسم شرف said...

ربنا يخليك يا دكتور مجدي
بتشجعيك الدائم لن اتوقف عن العمل وخصوصا بعد صرنا مشروع واحد لموضوع كوميكاوي واحد ..
صدقني الكوميكس اللي انت بترسمه ونشاطك هيكون خيط يمشي عليه ناس كتير بعد كده

 
At 10/29/2006 9:45 AM, Blogger tamer afify said...

باسم
عودتنا دايما على الأفكار الجديدة والغريبة
والنهاردة جايب لنا فانتازيا الموت
والملايكة المودرن

ايه الجمال ده؟
تحياتي

 
At 10/29/2006 9:51 AM, Blogger باسم شرف said...

ربنا يخليك ياتمور

ايه رايك في الملايكة بالجينز .. حلوين ؟ ولسة في الشتا هالبسهم جديد ان شاء الله

والجمال هو جمال كلماتك ياجميل

 
At 10/30/2006 1:26 AM, Blogger Dalia Ziada said...

جميل جدا يا نجيب يا ريحاني , سوري قصدي يا باسم

صياغتك أكتر من رائعة, لكن ليه كل اليأس ده؟ دول لسه سبعة و عشرين؟ أمال لما يبقوا اربعين و لا خمسين هتعمل ايه؟

و عموما كل سنة و أنت طيب ولو إنها متأخرة

داليا زيادة

 
At 10/30/2006 4:17 AM, Anonymous رانيا said...

سؤال يعصف بتفكيرى هو الجينز بتاع الملكين مكنش " درتى " ولا ايه ؟؟؟؟

القصة دى كان لازم تكتبها لما تممت 23 سنة ولازم كل واحد فى بلدنا دى يرمى نفسه من فوق كوبرى سته اكتوبرأو ممكن يستقرب ويرمى نفسه من شباك بيته أقرب وساعتها مش هيلاقى لا ملايكة بيض و لا شياطين حمر هيلاقى الناس بتخانقه لتعطيل جثته لحركة المرور .

يارب يسر لهاشم ده و ينشر كل اللى ليه و اللى لغيره وربنا يوفقكوا جميعا و كل سنه و انت طيب علشان عيد ميلادك اللى فات من شوية مش كتار

 
At 10/30/2006 4:19 AM, Blogger AZ said...

هو يعني الدنيا مفهاش حد الا هاشم!!!!!
ماتعرضها علي ناس تانيه..... بعدين حد ينتحر علي سته اكتوبر!!!! اومال قصر النيل عملوه ليه يابني... طب دي احلي انتحاره اللي من علي قصر النيل دي بتعمل دماغ والملايكه بتوع هناك بيبقوا اشيك حتي من بتوع اكتوبر

 
At 10/30/2006 6:08 AM, Blogger باسم شرف said...

داليا زيادة

انا شايف اما يعدي الثلاثين اكيد اكون انسان جديد وهابطل السجاير وهاشيل حديد

والله ما يأس .. وانتي طيبة
بس دي مش عشان عيد ميلادي

خليها علي الله
علي العموم خير وربنا يخليكي لانك هتكوني من اهم المترجمات ان شاء الله



رانيا
كل واحد مننا ليه الملايكة اللي يلبسهم زي ماهو عايز

ez

هاشم يجد متعته في اللي بيعمله فينا
اما عن ملائكة قصر النيل دايما عندهم زحمة وانا بحب الهدوء

 
At 10/30/2006 6:46 AM, Blogger AZ said...

az يا ريس مش ez
علي العموم مقبوله منك........ علي فكره صباحك سمبتيك وتفانين دول بلوجات مشتركه مش بتوعي لوحدي يعني.. احلامي المبعتره بس هي اللي بمارس فيها سلطاتي المطلقه هع هع هع هع

 
At 10/30/2006 2:27 PM, Blogger حنيـــــــن said...

ياترى هايكون احساسك ايه فى عيد ميلادك ال 37 !!!؟

كل سنه وانت طيب

 
At 10/31/2006 12:15 AM, Anonymous shaimaa said...

كل سنه وانت طيب ولو انها متاخره شويتين

وانشاء الله الكتاب ينزل قريب خلي املك في ربنا كبيييييير

اكيد هاشم في يوم من ذات الايام هينزلهاا

علي فكره الاستربسايه بتاعه منو فيه جامده جدا جدا

 
At 10/31/2006 5:57 AM, Anonymous Anonymous said...

saba7 elfoll 3ala elketaba elgamila
she2 7a2i2y a7ebb a20loh
fi-------
http://magdycomics.com/blog/

 
At 10/31/2006 7:21 AM, Blogger Human said...

كل سنه وانت طيب ........,واضح ان السنه الجديده عملت شغلها جامد

 
At 10/31/2006 6:08 PM, Blogger باسم شرف said...

az

اسف انها اخطاء الشيخوخة المبكرة بعد سن العشرين ارجو عدم الضيق ماحدث

بما انك تكتبين في اي مدونة تبقي اكيد هنستمتع
وعجبتني احلامي المبعثرة وحلو جدا اسمها


حنين
هيكون احساسي ب37 سنة مرت واحنا عايشين في صفحية زبالة كبيرة قوي


شيماء
شكرا ليكي جدا .. ملحوظة الاستربساية ملهاش دعوة بمنه فيه ليها دعوة برثاء رجل عادي
والموضوع الذي يشغلني انا ومجدي لماذا لا يكون الرثاء لهولاء العاديون الذين يعيشون حياة حقيقية
ويارب تعجبك الكوميكات الجديدة

عمي وعم الكوميكين مجدي الشافعي
دخولك هنا بالنسة ليا شئ عظيم والل كتبته عندك عني جميل وبيحرجني والله
واقرا التعليق هناك افضل

human
وانت طيب لكن عيد ميلادي من زمان لكن اشكرك
السنة الجديدة 2006 كانت بالنسبة ليا خوف لاني حققت حاجات كنت مبسوط منها في 2005 فخفت اني مقدرش احقق اكتر لكن الحمد لله

 
At 10/31/2006 7:19 PM, Blogger AZ said...

براحتك يا باشا.. اكيد ارحم من اللى ردت مره عليه و قالتلى "شوف يا استاذ عز".. الا هو صحيح عيد ميلادك امتى؟؟

 
At 11/01/2006 4:15 AM, Blogger باسم شرف said...

عزيزتي az
ماشي ياستي .. وعمري تجاوز السابع والعشرين في اكتوبر الفائت .. ادامه الله عليكم باليمن والبركات ...ههههه

عيد ميلادي كان في اكتوبر في يوم 14

 
At 11/01/2006 1:39 PM, Blogger shaimaa said...

كل سنة وانت طيب
انت حضرتك قبلى بيومين
انا كمان يوم 31 تمت الـ 27
فعلا احساسه غريب
اوى

بس الحمد لله
بكره تفوق وكله يروح فى الغسيل
تحياتى

 
At 11/01/2006 4:52 PM, Blogger باسم شرف said...

شكرا شيماء

انا مش زعلان عشان بقي عندي سنين كتيرة عشتها خالص والله .. وبحب شغلي لكن بخاف من الناس بس العشوائية

 
At 11/03/2006 4:58 AM, Blogger باسم شرف said...

نسيت اقولك ياشيماء كل سنة وانتي طيبة .. ويارب ماتروحي للكوبري لا 6 اكتوبر ولا قصر النيل

 
At 11/07/2006 6:05 AM, Blogger shaimaa said...

:D
وانت طيب
دول حتى حلوين فى الشتا

تحياتى

 
At 5/30/2007 11:43 PM, Blogger أشرف حمدي said...

مبروك يا باشا لقاء
OTV
لأ ده أنا المفروض أبارك للمحطة انها اتشرفت بيك
تحياتي يا فنان

 
At 5/31/2007 8:01 AM, Blogger باسم شرف said...

اشرف حمدي
اشكرك يافنان .. ربنا يخليك
انا بفرح جدا لما يكون الكلام يجي من فنان زيك
ميرسي جدا

 

Post a Comment

<< Home