محاكمة عاجلة لبابل في ميريت

تقام في دار ميريت ندوة لمناقشة

رواية "بابل مفتاح العالم"

للكاتب الروائي نائل الطوخي

يناقشها طارق إمام وفادي عوض

ويدير الندوة باسم شرف

.......................

الوقت : الاربعاء القادم 31 اكتوبر 2007

في تمام الساعة السابعة

......................

العنوان دار ميريت 6 شارع قصر النيل وسط المدينة

بجوار مسرح قصر النيل

................

فتحة في الحيطة

فتحة في الحيطة

( الشاعر يجلس تحت تربيزة وفوقها منتجات أمريكية متعددة

وواضحة جدا ومعلق في التربيزة راديو صغير وتسمع منه

موسيقي شرقية بصوت ضعيف ، وأحيانا تعلو الموسيقي

علي كلام الشاعر ولكن سرعان ما تهدأ تماما وتعلو أنغام

راقصة غربية وبداخل هذه الموسيقي رجل يتكلم عن الدين

فليكن الشيخ الشعراوي )

الشاعر : الحروب يتعلمنا نبص للحاجات بشكل جديد

ــ الكلمة التايهة في بقي

ــ شكل الكتاب المركون علي الرف

ــ المصحف القديم اللي عليه تراب من ساعة ما اداهولي
أبويا قبل ما يموت

ــ الحديث الشريف اللي كان دايما يقوله الشيخ في صلاة
الجمعة لما كنت بنزل أصلي أحيانا اللي بيقول
( إن الله يحب أحدكم إذا عمل عملا أن يتقنه )

ــ الست قيروز وهي ساكتة علي المسرح والموسيقي شغالة

ــ الجنيه اللي باقي في جيبي في آخر اليوم

ــ نشرة القناة الأولي المصرية وهي ما بتقولش حاجة مهمة

ــ الفيلم الدعائي اللي اسمه صلاح الدين الأيوبي ليوسف شاهين

ــ القلم اللي اداهولي ابويا علي وشي لما تأخرت وأنا راجع
من المدرسة عشان كنت بالعب

ــ صباع رجلي الصغير اللي طالع من الشراب جوا جزمة قديمة

إظلام مفاجئ

................

نص مسرحي كتبته ضمن المجموعة المسرحية

جزمة واحدة مليئة بالاحداث

التي صدرت بميريت وفي انتظار الطبعة الثانية

........

تظهر في الصورة الممثلة والمخرجة اللبنانية خلود ناصر

التي قابلتها في تونس اثناء الدراسة هناك وهذه الصورة من اخر عروضها

ظل انت الوحيد الذي تراه

الكتابة مثل راقصة قررت التوبة

وانت الوحيد الذي تعرف مدي صدقها اما من حولك فقد يكرهونك علي ان تتركها

ولكن لم تفلح خططهم في ان تتركها .. حتي اثبتت في يوم

انها تابت بالفعل ولديها الكثير من تقديمه غير الرقص

وصارت الحياة ... انا والكتابة وهم

...................................

الصورة .. للفنان الايراني ايمن المالكي .. مرسومة

يقال عنه انه فنان الكون الان

كوميكاية للعيد في جريدة البديل

واخيرا رجعنا انا والرسام الكوميكوي العبقري مجدي الشافعي نعمل كوميكس

ورجعنا علي عدد البهجة بتاع جريدة البديل

العدد اللي في السوق دلوقتي بتاع تاريخ السبت 13 اكتوبر رقم 89 وهيفضل موجود لمدة ثلاثة ايام

وكانت فكرة العدد حلوة قوي لما قالنا عليها الاستاذ وائل عبدالفتاح والحمد لله العدد عجب الناس ودا بسطني كتير

ودي بقي الكوميكاية

ممكن تقرا الكوميكاية بخطوات والتزم بيها

اولا : دوس عليها عشان تكبر وتعرف تقراها

ثانيا : لو معرفتش تقراها من الخط عشان زبالة معلش دي تعذرني فيها لانها بخطي وانا عارف انه في البلالة لكن يلا بقي نصيبكوا

ثالثا : ليك الحق تكرهني لو معجبتكش

رابعا : مش عايز شتيمة في السر ولا في الجهر عيب احنا اخوات

يلا قول رايك فيها وفي العيد .... وكل سنة وانتم بخير وحلاوة وسعادة وقشطة

محمد سعد وعادل امام في جود نيوز

نشرت هذه الكوميكية في مجلة سينما جود نيوز الشهر اللي فات

كتابة باسم شرف

رسم هشام رحمة

المفروض ان اسمها

فرفر

...................

وطبعا احب اشير للخطأ اللي حصل عند نشرها

انهم نسيو يحطوا اسمي عليها

بس

ويارب تعجبكم

مترو اول جرافيك نوفيل في الوطن العربي للكبار

مجدي الشافعي

انتهي مؤخرا رسام الكوميكس مجدي الشافعي

من اول جرافيك نوفيل في الوطن العربي للكبار

وانتهي ايضا من تسميتها حيث سماها مترو

ومن قبل حصل مجدي الشافعي علي جائزة افضل كوميكية

في ايطاليا وهي مسابقة عالمية

والان هو مشغول مع دار النشر ومع الغلاف والطباعة

وهي المرحلة الاخيرة حتي تظهر اول جرافيك نوفيل في الوطن العربي للكبار

بدا العمل بها منذ مايقرب من اربعة اعوام متواصلة وشهدت تغيرات كثيرة اثناء كل هذه الفترة حتي يصل الي الشكل النهائي

مبروووووك للدكتور مجدي الشافعي علي انتهائه من العمل ومبروك علينا قراءة العمل ومتابعة رسومه

..................................

لمن لا يعرف الجرافيك نوفيل

هي قصة مصورة طويلة مثل الرواية ولكنها مرسومة وتعتمد علي التتابع والحوار والسرد وتقدم قصصها للكبار والصغار