Tuesday, September 28, 2010

تامر حسني نجم الجيل




تامر حسني نجم الجيل


..والمثل بيقول .. اعلي ما في جيلكم اركبووووه


Wednesday, September 15, 2010

قال صحافة قال ؟

قال صحافة قال ؟

انا واحد من الناس اللي بحترم الصحافة والصحفيين وبهتم اني اقرا كل اللي بيتكتب لانه جزء من نبض الشارع والفن والسياسة .. لكن بكتشف حاجات مكنتش موجودة قبل كده وخصوصا مع انتشار المواقع التابعة لجرايد .. فكنت بدور في اليوم السابع من شوية كده فاكتشفت حاجة صغيرة كده .. لقيت حاجة عن جمال سليمان وهو طاقة تمثليه رائعة وقابل هجوم شديد في البداية واحنا كشعب متاسمح اللي كانوا مش طايقينه قبلوه والحمد لله ان المشاكل الصغيرة دي خلصت لكن يبدو ان جمال سليمان بدأ يظبط نفسه مع الصحافة خلاص ..برافو عليه ... انا بحب اللي بيشتغل وبيركز ومستشارين اعلاميين وكده .. والناس اللي بتفهم هتفهم .. او هما من نفسهم عشان بيحبوووووه وحسوا انه اتظلم في المشاهدة .. قريت في اليوم السابع ان نقاد الفن بيشيدوا بان مسلسل قصة حب من افضل تلت مسلسلات في رمضان ... جميل .. دا كويس .. مفيش مشكلة .. لانه بيجتهد .. لكني لقيت اتنين نقاد بس اللي اتكلموا وبيقولوا في المانشيت نقاااااااد الفن يشيدوا وكده ..علي الاقل يبقوا تلاتة عشان تليق عليهم كلمة نقااااااد عشان ده اسمه ولامؤخذة جمع .. ومنهم ناقدة باين بتشتغل في اليوم السابع وماسكة القسم الفني .. علي ما اظن .. والله اعلي واعلم .. وقبلها واخدين كلام من وزير التعليم اللي ساب شغله وقعد يتفرج علي مسلسل جمال سليمان .بيسالوه ايه رايك في دور جمال سليمان كناظر .. طبعا كل وزير بعد كده يسيب شغله ويدور علي المسلسلات اللي تخص مهنته ويقيم وياخد عامود ويدافع او ينتقد والصحافة تتهافت عليهم عشان مين منهم يكتب نقد والنقاد بقي يشتغلوا حاجة تانية ... . ومشاكل التعليم دي ايه يا باشا ؟ والثانوية العامة وهننزل المدارس وهنعمل خطط .. انا شايف ان وزير التعليم ينزل مع المقرر جدول البرامج والمسلسلات وبالمواعيد واتمني ان مينساش يحط برضه مع الجدول المساحات الاعلانية لانها ساعات بتاكل الوقت .. او علي الاقل بدل ما يتفرج يجيب للصحفية اللي كتبت الموضوع مدرس لغة عربية من الوزارة يصلحلها لغة عربية ... الاقتداء بالدال يا ماما مش بالضاض .. لانها جاية من قدوة مش قضوة .. عييييييييييب ... ربنا كريم علينا وعليكم

باسم شرف

Tuesday, September 14, 2010

مش عيب لما كاتب يموت جعان ؟

لما كاتب عايش محترم ... يبيع نص مكتبته عشان ياكل ..
يعمل ايه تاني في الحياة ؟ .. لما يموت متكتبوش عنه كلام ...
لمو الفلوس اللي هتتعاطفوا بيها معاه وادوها لكاتب جديد ..عشان يقدر يعيش ...
عشان يكسب اقل حاجة .. انه يعيش .. . بس

Sunday, September 05, 2010

المعارك الادبية بقت بزيادة قوي ... والله عيب

الخلافات اللي بقت كتيرة الفترة اللي فاتت خلافات خطيرة ومؤرفة بصراحة ... وبقيت اقرف اقراها ...واتهامات وردود وكلام فارغ ... الناس دي فاضية لمعارك جانبية مخزية فعلا ؟... واحد يبدا يتكلم والباقي مستنينه يرد ويبدأ كل واحد منهم يحط الكلام علي صفحات ومواقع وقراء يردوا واتباع ومريدين ... وللاسف احنا معندناش ثقافة الاختلاف ... احنا عندنا ثقافة العدو ... اللي مش معايا في رأي يبقي ضدي ... ويبدأ كل واحد يتهم التاني بانه عميل وجاهل وسطحي متناسيا ان الشخص ده في يوم من الايام ليه اعمال ادبية او فنية وهكذا ... وياسلام بقي لو الشخص ده يعرف عن الشخص اللي بقي عدو حاجات من الحاجات القديمة اول ما يختلف يطلعها وممكن يكون الشخص ده مأمنه علي سره .... وللاسف فيه جرايد بتستفاد من ده في خلق معارك عشان عدد الزوار او البيع يزيد .. وطبعا دي ثقافة استهلاكية تبتعد عن اخلاق المهنة وبقت اخلاق جريدة واحدة كلنا عارفينها النبأ .. انا اتمني ان المعارك دي تتصفي بقي .. وبلاش الناس تبقي عنيفة في ردودها كده ونحترم ان فيه ناس تانية عايشة ومختلفة معانا .. في اسبوع واحد اقرا معاركتين .. حمدي ابوجليل يكتب مقال فيه كلام عن عمرو رضا وعن طارق الطاهر .. بيقول رايه ويمكن اختلف فيه معاه وده من حقي ومن حق ان الناس تختلف علي سياسة افراد .. والكلام راح منه في حتة ان مجلة المسرح مش بتبيع خالص .. هو شايف كده لكن كان لازم يحط ارقام وتكاليف ..وخدته الجلالة شوية فعايز يقول ان الغيطاني وخيري شلبي بيتعبوا في شغلهم وكل الناس عارفة ده ... واللي مش عارف ده يبقي فعلا ميعرفش يعني ايه ادارة منطومة واختيار واشراف ... لكن اللي حسيته ان حمدي ابوجليل خانته الجملة وقال بيصرفوا علي المطبوعات من جيوبهم ودا تعبير عادي بيستخدم ومش لازم يكون علي سبيل المعني الاول ... مش مشكلة كل واحد بيفهم زي ما بيحب ودا بالنسبة ليا مش مهم لكن يقوم السيد يسري حسان يرد بشكل فيه اهانة في الرد ويطلع المستخبي ونبدأ في حكاية كل واحد عنده حاجة قديمة عن حد يطلعها ... اللي من حقه يرد يقول لحمدي جبت الكلام ده منين وبس وحمدي يرد
........ هي بصراحة معركة جانبية لكني حسيت بالقرف منها .. واهو لقيت معركة تانية علاء الاسواني اللي اتكلم عن حاجات شايفها واخبار الادب فردت مساحة كبيرة عشان يتكلم وقال كلام كويس .. فجاة الاقي رؤؤف مسعد يرد .. هو ليه كل واحد مختلف مع واحد يبدأ يترصدله ما تخلي اللي عنده المشكلة يرد لكن هنفتح الموضوع للتصفيات ؟
كل واحد عنده بلاوية ومشاكله فكل واحد يخليه في شغله ويهتم اكتر .. ويسيب اللي عنده مشكلة يرد يعني يا عم رؤؤف المشكلة بين جاكمون وعلاء الاسواني ليه نتدخل في معارك وخلاص ... واتمني والله اني افتح الجرايد والمواقع الاقي ملفات ادبية وثقافية مهمة قبل ما يخشوا في دواير الاستهلاك اللي هتقضي علي تاريخ كبير بمنطق العدوات والبيع والشرا .. وساعتها هنقول علي الدنيا السلام ...

..................
كلامي كله مع الاحترام لكل الاسماء اللي ذكرت داخل التدوينة
باسم شرف