ممكن ما نتكلمش تاني ؟

ممكن مانتكلمش تاني ؟

ممكن مانتكلمش تاني ...؟

ممكن وانتي ماشية تطفي النور ؟

وتسيبي القصيدة اللي كتبتها عنك تحت عقب الباب

عشان ممكن اديها لواحدة تانية

عارف ان ده ممكن يضايقك وانتي ماشية

ويمكن تسرحي في البنت اللي ممكن اقولها نفس القصيدة

وتسمعيني وانا بهمسلها بكلمة حب

وتشوفيني وانا بكتب اسمها علي ازاز العربية اللي غرقان في الضباب

فترجعي تخبطي .. واعند شوية

ومافتحش ..

فترني الجرس

وافضل في مكاني متعذب بالقلق بين اني اقوم وانقذ عقلك من الانتحار

وبين انك تنامي في ماضي تفتكري منه حكايتين عني

علي فكرة انا هاسيبك لخيالك اللي ممكن يرجعك ليا

وترجعي تصدقيني وتخافي مني وتقلقي

ممكن اقولك حاجة تضحكك ؟

ماتصورش اكون لحد تاني غيرك

تقدري تمشي وتطمني

اني ممكن اصحي تاني من النوم واكلمك ..

وصدقيني ان الدنيا زي ولد وبنت متخاصمين ... لكن بيحبوا بعض ..

..........................................

باسم شرف

.......................................

اوباما علي ناصية شارع الهرم مستني توك توك

لو يعرف اوباما ايه اللي اتقال عليه بين سواقين توك توك علي اول الهرم هيحلف ليسيب امريكا ويعيش في ليبيا .. اتنين واقفين بيقولوا لبعض.. والله لو الرئيس نوباما ده جه وقالي هركب هقوله والله ماهركبك .. قالو التاني ليه ؟ فرد عليه صاحبه فقاله عشان رئيس اسرائيل وانا مبركبش اسرائلين توك توكي

عشان كده شاور وقال هتولي الاتنين دول.. ..