صحافة الادب من خلال متابعتي ليها

بصراحة قريت موضوع اضايقت منه جدا وهو موضوع البيست سيلر اللي كان في اخبار الادب لقيت فيه حالة من الاستخفاف بالكتابة والكتاب ميصحش انها تحصل في جريدة مختصة بالادب .. انا قريت نفس الموضوع لما كان عامله وسيم المغربي في جروب علي الفيس بوك وكان عاملة بيسخر من الظاهرة بتاعة البيست سيلر وازاي كتابك يبيع
لكن هنا لما قريت في اخبار الادب ملقتش العناصر اللي تقول الخطوات ... يعني لما نكون عايزين نعمل موضوع البيست سيلر نجيب كتاب بيست سيلر ونشوف ناس من مكتبات مهمة بتبيع كويس ومديرين التسويق في دور النشر اذا كان فيه لو مفيش يبقي مدير الدار اللي فيها كتب حققت بيست سيلر وانا عارف ان صانع الموضوع الحاجات دي معدتش عليه عشان كده حسيت ان بيسخر من الكتاب ودا ضايقني ... يعني الناس اللي جابهم تقريبا ملهمش علاقة بالموضوع منهم واحد عمل اكونت علي الفيس بوك وبعت رسايل بقي فاهم في البيست سيلر .. طبعا كان فيهم ناس بحترمهم لكن مش تخصصهم ده .. اتمني ان الحاجات دي متحصلش في جريدة مختصة بالادب
.............................
مفتقد صفحة الادب بتاعة البديل جدا كانت صفحة محترمة ونشاط غير عادي
ويومية .. الله يمسيك بالخير يا سيد يا محمود انت وفريقك .. عارف انك بتعمل صفحة الاهرام المسائي بس مش بنفس قوة البديل اللي كان يومي وتعب ..
.................................

طبعا بحب صفحة الاخبار بتاعة الاستاذة عبلة الرويني .. يوم الخميس والحالة والتجديد اللي بتدور عليها هي وكاست العمل
وخصوصا صفحة الورشة دي جميلة ومحترمة وبتقدم اصوات جديدة الناس في حاجة ليها ومش مهينة زي بريد القراء بتتعامل معهم باحترام وبتجيب ناقد محترم يتكلم مع الشباب دي
..........................
يمكن اللي عوضني عن صفحة البديل المتابعة بتاعة اليوم السابع للاخبار والندوات اللي بيقوم بيها وائل السمري وفريق العمل وخصوصا ان معاه روائي من جوا الموضوع زي وجدي الكومي
بطل علي الموقع كل يوم عشان اعرف اللي بيدور في الدنيا بسبب ضغط العمل
بس يخفوا شوية من زاهي حواس لاني حسيت هيطلعلي من تحت الكنبه بتمثال ويقولي انت اصلك فرعوني
لكن ده ميمنعش انهم عاملين مجهود جبار في المتابعة

مش بحب اسماعيل يس ..... عشان الضحك طرق

مش بحب اسماعيل يس وبحب فؤاد المهندس ومدبولي والضيف احمد والقصري بيضحكوني جدا بحترم اسماعيل يس لكن مش بحب اتفرج عليه لانه مش بيضحكني عنده طريقة للضحك مش بقبلها لكن فؤاد المهندس او الضيف احمد او مدبولي بيموتوني من الضحك طريقتهم بتتغير كتير الحس الفني كان اعلي .. دا مش بيقلل من اسماعيل يس لكن عادي من حقي احب ناس ومحبش ناس عشان دي ازواق
زي ما انا مثلا بيضحكني جدا محمد هنيدي اكتر واحد ودا يزعل مني ناس كتير ومنهم اصحابي لكن انا بحب هنيدي لانه شبه الناس قوي
اديني بفضفض هنا بمزاجي وعلي راحتي
يعني الضحك ازواق وطرق وكل واحد يختار طريقته في الضحك المهم نضحك وننبسط

انا والسواك وقفاك

قاعد في امان الله بحكي مع اصحابي عن الاسنان وتعبها وكل واحد مر بتجربة مؤلمة في اسنانه وهي اصعب تعب .... قعد معانا واحد وقعد يقنعنا باننا لازم نستخدم السواك زي الرسول - ص - وهيحل كل المشاكل اللي في الاسنان واحول اقنعه اني استخدمته بوظلي بوقي مش عايز يقتنع يقولي اصل الرسول -ص - كان بيستخدمه واحاول اقنعه ان الرسول بشر وكان قاعد في الجزيرة العربية وليه طبيعة غير طبيعتنا .. يقولي لا برضه انت مش عايز تعمل زيه .. واقوله واعمل ايه؟ يا معلم وانا جربت ومنفعش وكل واحد ليه طبيعة جسدية مختلفة واقوله يابني انا بتكلم كلام تجربة يقولي العلم ايه جنب فعل الرسول .. عصبني جدا وحلفت ما ادخل بيتنا سواك وبقيت اغيظ فيه كل ما اشوفه اقوله كل ما هلاقي سواك هضربك علي قفاك .. لحد ما زهق و اقتنع ان العلم مفيد وبدا يستخدم فرشة اسنان طبية مش ام 2 جنيه ونص من العتبة راح لدكتور