غزة - توأم - بنتر - الزمالك
علي هامش غزة والدعاء لهم
في ظل دعائنا لأخوانا في غزة سمعت خطبة الارجوز المدعي حسن نصرالله وبدلا من سماحة الشيخ والتي اعطيناه إياها سنردها ونسميه سفالة الشيخ .. لسانك طول يا برنس علي مصر وبدلا ما انت قاعد تنظر وتطالب مصر بفتح معبر رفح ما تفتح المعبر الاقرب ليك اللي هو معبر كرم ابو سالم اشمعني معبر رفح فقط اللي عمال تنادي بيه واتهامات وشتائم انت بالتأكيد ستعتذر عنها .. ( احنا مع غزة ونصرتهم ايا كان الموقف ولكن مسالة فتح المعبر ليست بالسهولة عشان مش قاعدين في قهوة افتح فيفتح .. الموضوع سياسي ومعبر يتفتح يعني دخول ومين عارف ايه اللي ممكن يحصل مش اخواتنا الفلسطنين ولكن اكيد معبر زي ده مش سهل يتفتح ولكن احنا بنستقبل الجرحي ودا حاصل لكن سفالة الشيخ نصرالله الذي يقف في سيرك لابد ان يكف عن طولة اللسان ولا نسي سفالته الخطبة المخزية اللي اعتذر فيها عن معركة راح ضحيتها الاف اللبنانين وتشريد وهدم بيوت عام 2006.. لو راجل بحق كان اعتصم وقال خطبة اكثر شجاعة من هذه .. ثم جالي اميل بيقول ان واحد شيخ من قناة الناس عايز يعمل انتفاضة ضد مبارك .. ايه يا سيادة البرنس ؟ ما تفكر تعمل حاجة افيد وهو هيعملك ايه .؟ يا عم ادعي ربنا يوفقهم .. عشان معركة بره الحدود نعمل معركة داخل الحدود .. وعايز تفكر وتحل بالعقل يا برنس الليالي .. واخيرا ندعو لهم بنصرتهم وابادة شعب زي إسرائيل دا شئ بنتمناه كلنا ..
....................................................
حسام وابراهيم
انا بصراحة ضد الحكم قبل التحقيق ودا طبعا جزء من فساد عام عايشين فيه .. كون الجمهور الجزائري غلط فيه عايزينه يعمل ايه ؟ ... واحد واقف بيشتمك باهلك وبيضرب فيك وانت واقف تقوله انا هقول لابوك .. اكيد كل واحد عنده طاقة وهما بصراحة زودوها وحسام وابراهيم كنتم شوفتو اللي حصل واحكموا لان المخرج بتاع الماتش والمصور جزائري فمش هيجيب اللي حصل كله وطبعا ده حقيقي كتير .... ومدير البعثة اللي تم استضافته امبارح اتلجلج في الكلام عايز يقول انه مع ابراهيم حسن وحسام حسن لكن من طريقة حواره تعرف ان فيه ضغوط عليه .. وفريق زي المصري مكنش هيكون فريق في الفترة الاخيرة الا بحسام وابراهيم .. يا نادي المصري تراجع عن قرارك واستني التحقيق .. عيب
...........................................
نعي كاتب مسرحي كبير زي هارولد بنتر شئ مش سهل .. انا من الناس اللي عاشت علي كتابة بنتر وعملت كذا مسرحية ليه .. رحل امس تاركا ثروة ادبية ومسرحية وجائزة كبيرة زي نوبل وهاخصص ليه مقال كبير عنه ومواقفه السياسية والادبية ....
.......................
الزمالك
كل الناس عارفة اني زملكاوي ومش حابب فكرة اننا اتعودنا نتغلب وعادي مفيش أي حركة .. وعشان كده هسال سؤال مهم لكل مشجعين الكورة واللي مش مشجعين كمان
... اخر فريق غلب الزمالك هو ..
مكرم عبيد – نبيلة عبيد – بني عبيد
اتصل علي رئيس النادي والجهاز اللي في التراوة واخواتنا اللعيبة المحترمين عشان ربنا يوفقهم ويتغلبوا اكتر
..................................................
تعديل
تم تغير جملة بسبب غلطة عندي وصلحتها شكرا لاصدقائي اللي نبهوني ليها لاني كتبتها بانفعال
صباحك قشطة
posted by باسم شرف @ 4:29 AM
