Thursday, March 27, 2008

مش انيس منصور

مش أنيس منصور..

الكتابة عادة ما تحتاج لمزاج فأر جائع
الدنيا ولد وبنت متخاصمين لكن بيحبو بعض .

قابلت نفسي مرة في الشارع عملت نفسي مش واخد بالي ومشيت .
قابلت بنت نسيت تلبس روحها فستان حلو عشان تتحب .
البنت ممكن تتحب لو بطلت عناد .

أوعي حلمك يزوالك
علي قد حلمك مد رجليك
فصل حلم علي مقاسك لا يكون كبير تغرق فيه ولا صغير فتاخد برد.


المرأة رحلة .. قد تمتعك وقد ترهقك
المرأة اتوبيس .. ساعات بيكون مكيف وساعات يبقي حكومي
المرأة غير الرجل .. ما هو دا العادي إيه الجديد ؟
المراة ست .. ساعات تبقي ست كوم يضحكك
وساعات تبقي ستاشر نكتة بايخة تقرفك


الرجل هو الذي يكتب مثل الكلام السابق عن المرأة

الحزن ضيف ساعات بيكون جميل وساعات بيكون رزيل

اذا كان هيعيش كتير جواك لازم تعمله مساج يومي عشان ميتعبكش
الحزن عايش معايا ياكل من اكلي وبيخش معايا
ياخد دش زي الطفل الصغير

و ساعات بطلع عينه وابعته يجبلي عيش من الفرن



عادات تحتاج لرجل موجود 2

عادة ما نؤمن باننا موجودون فنصبح ذكري للضحك
وتزداد السنين في المسافة بينك وبينهم
فتاتي الحكاية فيضحكون ..
الذكري تحتاج لرجل مات لا لرجل يوقع كتابه الجديد لقارئ



عادة ما تبتسم الفتاة لكلمة مرت خلسة باعجاب لها
ويزداد حبها لك كلما تكلمت عن نجاح البطلة بفليمها الرومانسي
فياتي الفيلم وانت تمارس عملك اليومي في مسح الارقام من هاتفك
الحب يحتاج لفيلم رومانسي طيب في ضوء السينما الخافت


عادة ما نفكر في كتابة لحظة ترضي بها قارئ
الكتب تتكاثر والتراب يعيش
فتجلس وحيدا تقرأ ما كتبه الاصدقاء
الكتابة تحتاج للاسف لقارئ ليس لكاتب


عادة ما يموت الكثير في روؤسنا خوفا من موتهم الطبيعي
ننام خوفا من فراقهم
الاهل بيت الخوف والموت المفاجئ
الراحة تحتاج لقبر وشمس

عادة ما نعيش وحيدون وفي ضلوعنا الخوف من ان نجلس وحدنا
الم الوحدة يفتك بك وانت في انتظارها لكي تقول لها ببكاء اني اتوجع من الوحدة
الوحدة ابنة كلب جبان يعيش في ظلنا
دائما ما نخشاه ومتأكدون انه موجود



نشر هذا الموضوع في الدستور الاربعاء عدد رقم 158 بتاريخ 26 مارس2008
بضربة شمس

10 Comments:

At 3/29/2008 3:15 AM, Blogger ســـــــمــــكة said...

جميلة اوي بجد بس الخط متعب اوي برضو
عجبتني "الكتابة تحتاج للاسف لقارئ ليس لكاتب"
فعلا الجميع يكتب بقوة وبردائة لكن أين الذي يقرأ من يكتب لا يريد سوى أن يقرأ لنفسه وأن يعجب بنفسه ليكون المدح لنفسه

تقول لها ببكاء اني اتوجع من الوحدة "
"الوحدة
أخالفك هنا ربما تكون الوحدة مؤلمة لكن بداخلنا حب شديد للوحدة ربما لتشعرنا بالأمان والسلام
بوست رائع
تحياتي

 
At 3/29/2008 7:21 PM, Anonymous بسمة said...

(البنت ممكن تنحب لو بطلت عناد)
ربما لو فقدت الفتاة ملامح شخصيتها تصبح لا تطاف
اعجبني ماكتبت ياكاتبي المميز
كـــــــــــــن بخيــــــــــر

 
At 3/30/2008 7:47 AM, Blogger k H o L i O said...

جامد أوى ده ياباسم
بس كل الحاجات دى بيتهيألى انا قريتها عندك قبل كده و ان كان دا ميمنعش انها مواضيع جامدة جدا :)

مش هاطول عليك

سلام يا فنان

 
At 3/30/2008 3:45 PM, Blogger محمد صبحى said...

جامدة ياباسم باشا
وبصراحة كل الدستور كان جامد جداً ف العدد اللى فات

تحياتى ليك

 
At 3/30/2008 6:32 PM, Blogger باسم شرف said...

سمكة
اشكرك علي كلامك الجميل
وطبعا لازم تخالفيني في الوحدة لان الوحدة زي البصمة بيختلف طعمها من شخص للتاني
لكن قشطااااااااات

..............ز
بسمة
والله انا فرحان بكلمة كاتبي المميز علي الرغم من انها كبيرة قوي عليا
واشكرك علي زوقك الجميل
..................
خوليو
صباحك عسل يا فنان
انا فعلا نشرت حاجات منها علي اجزاء لكن علي بعضها اول مرة عند خالد كساب في صفحته ضربة شمس
قشطاااااااات
...........
محمد باشا صبحي
طبخة كساب جامدة جدا وهو فعلا عدد اسطوري ومبسوط من رد فعل الناس ومبسوط ان الموضوع عجبك
قشطااااات

 
At 4/02/2008 11:25 AM, Blogger nour said...

اصلا احسن مقال نزل يومها فى الدستور مع عدم الاعتذار
انت عارف انى مش بجاملك

 
At 4/04/2008 4:02 AM, Blogger باسم شرف said...

نور
ربنا يخليكي ده من زوقك لكن بصراحة العدد كله كان عجبني والرسم والاخراج والتنفيذ ودماغ كساب في الخلطة الجامدة دي
صباحك عسل يا نوووووووور

 
At 5/09/2008 3:36 PM, Blogger dodda said...

حلو اوى..
اتمنى ان نتحكم فى عاداتنا
كحك
فسيخ
لب
النشادر اسفل الكبارى!!!

 
At 5/09/2008 5:54 PM, Blogger Mo7ammad said...

البوست ده كان خرافة لما اتنشر فى العدد الأسطورى لضربة شمس .. تحياتى يا باسم

 
At 5/09/2008 8:31 PM, Blogger باسم شرف said...

dodda
تسلمي والله ودي اهم حاجة
قشطة عليكي
..................
محمد باشا
ربنا يخليك يا معلم وده من زوقك
اشكرك

 

Post a Comment

<< Home