Friday, October 24, 2008



صدرت الطبعة التانية من كتابي
جزمة واحدة مليئة بالاحداث
عن دار ميريت للنشر
تطلب الان من المكتبات ومن المقر
6شارع قصر النيل بجوار مسرح قصر النيل
الدور الاول



بعض النصوص من الكتاب

إهداء

ـ إلي كل من خرج من تحت البطانية في عز البرد
ويبص من الشباك عشان يقول حاجة .....

ـ إلي ملامح وش عمي اللي شفتها ممددة علي سرير الموت.

..................................................

الكرسي الفاضي

المهدي المنتظر : علي فكرة أنا مش جاي .

إظلام مفاجئ
.....................................


تحت الأرض

فتاة فى سن الشباب تجلس على مقدمة المسرح من ناحية اليمين

وفى الجانب الآخر يجلس ولد , يزدحم المارة من خلفهما ,

فجأة الكل يثبت نظرته تجاه الفتاة ويقول الولد :

الولد :- جوا المترو الناس بتمارس العادة السرية بملامح

وشوشهم لما يشوفوا بنت واقفة وساندة ظهرها على الباب .

إظلام

.......................................................

كراكيب

( شاشات عرض على المسرح وراديو معلق في الفضاء المسرحي )

القناة الأولي : ما تقولش حاجة ساقعة قول كوكاكولا . هذا المشروب

هو الراعي الرسمي لمسابقة ( miss Egypt ) لهذا العام,

نتمني لكم صوما مقبولا , وإفطارا شهيا .

القناة الثانية : ماكنتش ناوي أغني لكن لقيت الفرصة قدامي ,

قلت أغني ولما غنيت لقيت نفسي ممثل معروف
ربنا يسهل وعايز أوصل للعالمية .

القناة الثالثة : والله حكاية الربا والكلام ده اتكلمنا فيه كتير , لكن

علي ما أذكر كنت قلت انه حلال من أجل

المصلحة العامة والله أعلي وأعلم .

صوت الراديو : مات الشيخ أحمد ياسين قائد حركة حماس اليوم .

رجل : ( يدخل ويمر أمام هذه الوسائل الإعلامية ثم يقف أمام الجمهور)

أنا عايز أعلق علي الحدث ده ، لإني حزين جدا

ازاي الأهلي انسحب وأنا شايف إن ده مشكلة كبيرة لكن ربنا يوفقه في البطولة اللي جاية.

إظلام
...................................................................


مشهد رومانسي عادي جدا

الشخصيات :

شاب 23 سنة

فتاة 20 سنة

شاعر 23 سنة ( يشبه الولد إلي حد كبير )

( 1 )

( يقف كل منهم في مكان لكن على مستوى واحد فليكن في عمق المسرح )

الولد : نفسي أحب بجد .

البنت : نفسي أحب بجد .

الولد : نفسي أبطل كدب عليهم واختار واحدة بس .

البنت : نفسي أبطل أصدقهم كلهم واختار واحد بس .

( 2 )

( يقف الولد أمام البنت وكأنهما في وسط الحديث )

الولد : إحساسي بالضعف نفسي أعيشه مع حد .

البنت : ( تصمت باستغراب )

الولد : من زمان نفسي أصاحب بنت تحس بيا بجد ،
أحكيلها عن كل اللي بيحصلي ، ولما أرجع مرة وأحس اني وحيد
في يوم من الأيام أجري علي التليفون وأحكيلها عن كل اللي جرالي،
وخصوصا بعد ما صاحبي سافر، مبقاش فيه حد أحكيله.

البنت : انت عنيك بتدمع .

الولد : ( يهم بمسحها بسرعة وكأنه قد خجل منها )

البنت : سيبها متمسحاش .

( صمت طويل )

الولد : حاسس إني ضعيف قوي .

البنت : ( تنظر له بإعجاب ) ياه ، ( وتضحك ) .

الولد : هو ده اللي بدور عليه، إني أحكي ضعفي قدام حد ،
ساعتها تبقي هي دي البنت اللي نفسي أحبها بجد .

( يثبت المشهد وكأنهم في لوحة قد رسمها فنان يعشق الملامح الجميلة
المليئة بالمشاعر لكي توضع بجانب قصيدة رومانسية
)

الشاعر : يعني إيه بنت حلوة ؟

ـ يعني صوت نغمة طالعة من طبلة .

ـ صوت الشاب خالد اللي طالع من عربية وانت واقف

في الدورالرابع بتبص علي النيل .

ـ صوت المطربة لما يسكت جوا أغنية بتحبها .

ـ الكرافتة المربوطة كويس .

ـ كوباية شاي تقيلة سكر مظبوط .

ـ رقصة التنورة في المولد .

ـ القناة الخامسة المصرية لما تجيب برنامج حلو .

ـ أغنية بيغنيها صاحبك اللي بتحبه .

ـ تأثرك بقراءة (مقتل ثلاثة فلسطينيين وخمسة عراقيبن)
اسفل الشاشة وهي عارضة أغنية بورنو .

ـ البنت الحلوة اللي ممكن تتكلم معاها في كل حاجة

ماعدا الحب .

( 3 )

الولد : فاكرة أول مرة كلمتك فيها ؟

البنت : أكيد .

الولد : كان تعارف عجيب بالنسبة لي .

البنت : إنت اللي كنت عجيب .

الولد : جيت وقولتلك ازيك وانت واقفة في المترو ،
مع إني ماكنتش أعرفك ،وكنت لابسة ساعتها قميص أبيض وبنطلون جينز أزرق.

البنت : وانت كنت لابس تي شيرت أحمر وبنطلون أسود .

الولد : علي فكرة أنا مش بحب اللون الأحمر .

البنت : آمال كنت لبسه ليه ؟.

الولد : مش دايما اللي بحبه أعمله .

البنت : وانت حبيت تكلمني ؟

الولد : ( يصمت ) لأ .

البنت : ( تنظر له بغيظ ) .

الولد : لأني أول مرة أعملها ، حسيت إني عايز أكلمك ، وانا

عمري ما رحت واتعرفت علي حد ، فعملت عكس ما أنا مفروض أعمل .

البنت : والمفروض كنت تعمل إيه ؟

الولد : أبصلك وأضحكلك بس .

البنت : بس ؟

الولد : آه بس .

الشاعر : البنت الحلوة هي الصورة المحتفظ بيها في جيب المحفظة .

( إظلام تدريجي علي الثلاثة )


....................................................................
باسم شرف

13 Comments:

At 10/24/2008 6:36 AM, Blogger كلام وخلاص said...

مبروك الطبعة التانية الغلاف جميل مع انه احمر وانت مش بتحب اللون الاحمر
عارف المفروض فعلا الضعف مايبانش غير قدام ناس بتحبك بجد
على الرغم اننا ماتعودناش على طعم المسرح بوجه عام والجملة المسرحية القصيرة بوجه خاص بس بجد مش مستغرباها وحاسه انها جميلة فعلا
سلام

 
At 10/24/2008 7:42 PM, Blogger طارق إمام said...

مبروك الطبعة التانية اللي اتأخرت بسبب الأزمة الاقتصادية العالمية في 6 ب شارع قصر النيل
(:
قشطة يا بسوم و انشاءالله تواصل نجاح اختها الطبعة الأولى

 
At 10/26/2008 1:57 PM, Blogger كلام وخلاص said...

من فضلك عاوزة اعرف الاقيها فين فى اسكندرية

 
At 10/28/2008 12:15 PM, Blogger iHaB said...

مبروك يا معلم

 
At 10/30/2008 8:20 AM, Blogger قهوة بالفانيليا - شيماء علي said...

باسم..
انا عاوزة الكتاب دة
طيب اجيبه منين و انا في الكويت اصلاً ؟؟
و مش هعرف انزل مصر قبل السنة الجاية ..
ربنا يسهل

 
At 10/30/2008 8:54 AM, Blogger باسم شرف said...

كلام وخلاص
الله يبارك فيكي ياقمر وربنا يخليكي
مش عارف ازاي بيوصل للاسكندرية لكن ممكن ابعتلك نسحة اليكتورنية لحد معرض الكتاب بتاع الاسكندرية
وصباحك قشطة

................
طروووووووق
ربنا يخليك يا معلم وانت رفيق الطبعة الاولي بندواتها وسلاطتها وكمان التانية ببابا غنوجها يا معلم علي طول منورني
...................
هوبة يا معلم الله يبارك فيك
............
شيماء
مش عارف ازي يوصل للكويت لكن ممكن تبعتيلي ايميلك ابعتهولك نسخة اليكترونية
وصباحك قشطة وميرسي علي اهتمامك

 
At 10/30/2008 4:32 PM, Blogger بسنت said...

مبروك على النسخه التانيه
هجيبها لما انزل معرض الكتاب ان شاء الله الجاى دى اقرب فرصه
اسلوبك فى القصص -- اسكريبتات تمام
ودا بيعجبنى جدا
الى الامام دايما

 
At 10/30/2008 6:45 PM, Blogger dodi said...

الولد : هو ده اللي بدور عليه، إني أحكي ضعفي قدام حد ،
ساعتها تبقي هي دي البنت اللي نفسي أحبها بجد .


بجد مش عارفه الاقي كلام يعبر عن اللي بحس بيه كل ما اقرا كلمه بتكتبها


فيه نصوص كاتب فيها سطر واحد بس محتاج سنين تفسير وفهم لكل معنى فيه

بجد تسلم دماغك

بس بالراحه علينا شويه

 
At 11/01/2008 2:53 AM, Blogger كراكيب نـهـى مـحمود said...

باسم الجميل الف مبروك على الطبعه التانية وان شاء الله تكون حفلة توقيع جديدة ومناقشة طيبة
خالص امنياتي لك

 
At 11/02/2008 7:40 AM, Blogger كلام وخلاص said...

انت عمال توزع نسخ الكترونية ايه مش عاوز تبيع؟انا حاستنى المعرض واجيبه عاوزين توزيع كويس زى الطبعة الاولى

 
At 11/02/2008 7:47 AM, Blogger باسم شرف said...

بسنت
ربنا يخليكي وده شرف ليا وهاستني رايك

......
غادة
اشكرك يا استاذة ويارب نكون عند حسن ظنك دايما
................
نهي اشكرك علي حماسك القديم والذي تجدد
..................
كلام وخلاص
خالص والله خايف النسخ مترحش اسكندرية لكن هاستني في المعرض انا كمان
صباحك قشطة

 
At 11/08/2008 11:46 PM, Blogger mirage said...

مبــــــــــروك يا باسم :-)
عقبال الثالثة ;)

 
At 11/13/2008 7:53 PM, Blogger باسم شرف said...

ميرااااااااج
الله يبارك فيكي

 

Post a Comment

<< Home