Saturday, December 02, 2006

ما عادي الحياة لسة بقميصها

ما عادي !الحياة لسة بقميصها
من السذاجة ان تؤمن بأنك نبي
او انك نزلت برسالة في وطن لايؤمن بالرسلات
او انك الوحيد الذي نزل بمعجزة في ايام لا تأتي فيها المعجزات
او انك العالم بما يدور في ام رأسك وانت تخبط اصبعك علي الكيبورد بحثا عن حرف ضائع منك
او انك تسمع موسيقي العنب او السمك او اي اغنية دسمة في مكيروباص تركبه او يمر بجانبك او تسمعها اتية من كبينة عربة امن مركزي امام مظاهرة تافهة
او انك تضعك يدك في جيبك تبحث عن جنيه تعطيه صدقة لرجل سائل تشك في ملامحه بالنصب
او تشاهد حلقة درامية مدتها 45 دقيقة لا تستطيع ان تغير القناة لانها لبطل يشبه اعلانات اولويز الخاصة بالمرأة
او انك تتذكر اسم شخص تتحدث معه
او تهرش في مؤخرتك وانت تفكر
او تقرا هذا الكلام الان

من الجميل ان تسير كما يتطلب مزاجك الشخصي حتي وان كان يريد ان يرقص في الميدان او ان يخلع عباءة الحياء ويسير عريان
والاكثر احترام ان تؤمن بانك انسان عادي حتي وان تطلب هذا ان تتحدث في موضوع لا تعلم عنه اي شئ او ان تجيب علي سؤال من احد المارة وانت لا تعرف الاجابة فلا تضيع الفرصة في ان تكون انسان عادي
ماعادي ياعم الحياة لسة ماشية علي رجليها وصوابعها مقطوعة
هي اتعودت علي كدة لانها بتلبس قميص نوم ابيض عشان يتوسخ بسرعة
متنساش ان كل اللي انا قولته كلام تافه ملهوش علاقة باي حاجة مهمة غير انه كلام مش مهم في زمن مش مهم
وقشطة
لا تتردد ان تنسي كل هذا لانك الان نسيته بالفعل

23 Comments:

At 12/02/2006 10:38 PM, Blogger Saikoman said...

انا سمعت اغنيه بتقول
عادي عادي كله عادي
وعادي ده بقولها كتير عارف ليه عشان احس ان الحياة غصبن عني عادي
و عادي عادي كله عادي

اه الحلوه ده يا باسم

 
At 12/03/2006 4:57 AM, Anonymous Anonymous said...

مش عارفه هو ده عادى حياتنا اللى فرضته علينا و لا عادينا احنا اللى فرضناه عليها؟؟
لازم نعيش الحياه بالعادى او الغير عادى
مش عارفة
امشوا عريانين ماشى ؛ بس حرام لو حد سألكم عن حاجة و انتوا مش عارفين اجابتها بلاش تجوبوا أى اجابه علشان حرام؛ ده انسان مضل و مش عادى
هو اكتر شىء عادى انك تحس انك عايش و تحاول تحى نفسك العادية
عادى عادى عادى كله عادى

باسم و حياه ابوك بلاش تكتب كلام عادى كده تانى

 
At 12/03/2006 5:31 AM, Blogger We2am said...

mm..la mgal llta3qed hena tab3an..bma eno kolo 3ady..a7la 7ettaهي اتعودت علي كدة لانها بتلبس قميص نوم ابيض عشان يتوسخ بسرعة
eldonia kida fe3lan..dah 3'er b2a t2kedak eno kolo msh mohem w tafeh..l2nk 3ady..wooow..ahe 3shan kida hatlz2 fe nafo7'na :))

 
At 12/03/2006 5:57 AM, Blogger باسم شرف said...

ايهاب
فعلا كله عادي
اختبر مرة حاجة حصلت او محصلتش هتتغير بعد فترة
.............................
عبدالله
تعرف ان حلواة الدنيا انها عادية
.....................
رانيا
تفتكري لو مكتبتش كلام عادي هنبسط ازاي ؟
...................................
وئام
تفتكري انها ممكن تلزق في النفوخ فعلا ؟
..................................

 
At 12/03/2006 10:19 AM, Blogger Tamer Nabil Moussa said...

شوف ياريس الشىء اللى ما يعجبنا نكبر ولا ننظر لة ونقف عندة

عدى على الغث وخلينا فى الثمين

تحياتى

 
At 12/03/2006 11:36 AM, Blogger علي الالفي said...

هو انت كنت فاكر انه مش عادي
و للا فهمت كدة متاخر
يا سيدي عااااااااااااااااادي
بس انت تقدر تنفض و تتطنش اللي مش حابب تشوفه تقول عليه وحش
و تركز مع حاجة تانية تقول عليها حلوة
عاااادي
على فكرة انا جاي القاهرة الاسبوع ده و عندي حفلة قريب
يا ريت نتقابل
علي البورسعيدي

 
At 12/03/2006 12:13 PM, Blogger كراكيب نـهـى مـحمود said...

توقفت في الفترة الاخيرة عن ارتداء قمصان النوم البيضاء التي تتسخ بسرعه ربما لدخول الشتاء الذي يقذف في وجهها بالطين والأوحال فتزداد أصباغ العاهرة قبحا
اصبحت ترتدي معطفا متسخا مرقعا بجلد ثعبان أو فراء دب غالي وتستند على عاج فيل وتمضي في ميدان طلعت حرب اللي مات مشلول وهوه شايف مصر قدامه بترقص على الارصفه الاربعه المواجهه للمكان حرية بقى والناس فرحان وعربات الامن المركزي تحةلت لنقل الخضار من سوق العبور مع توصية باغراق السوق بالكرنب والقرنبيط علشان الشعب ياكل
باسم ايه اللي انا بقوله ده ربما عادي عادي تماما كذلك العادي الذي كتبته فاثار في ما اثار تحياتي وقشطة وكده يعني

 
At 12/03/2006 3:17 PM, Blogger tamer afify said...

باسم
كلماتك دايما غير متوقعة
وبتفتح بيبان للعقول اللي بتعشق تفكر
وفي الآخر ماتوصلش لحاجة

تحياتي
تامر العفيفي

 
At 12/04/2006 3:34 AM, Blogger Ayat said...

هى الحياة فعلاً عادى .. وعادى جداً كمان
بس كلامك مش عادى .. مع انك بتقول انه عادى.. بس المفروض تاخد الموضوع عادى أكتر من كده .. ماتحبكهاش يا راجل .. ده حتى كله عادى .. وكمان عاوزة أقول انه صعب اللى قلته يكون اتنسى على ما الواحد يخلص قراية .. صحيح هو عادى .. بس ما يتنسيش
و قشطة برضه

 
At 12/04/2006 6:27 AM, Anonymous Anonymous said...

رائعة يا باسم
عشان كدة ح اعزمك تتفرج على الفيلم القصير التحريك جرافيك اللى على البلوجى

مجدى الشافعى

 
At 12/04/2006 8:38 AM, Blogger nour said...

مش عارفة اقول حاجة كلامك الواحد يقراه ميقدرش يتكلم..عادى؟بنقولها كام مرة فى اليوم الكلمة دى؟الف مرة؟
كلامك عمره ما يتنسى بعد ما يتقرا..بيلزق فى الدماغ علشان نسترجعه كل شويه و نفضل فى حالة اللا كلام اللى انا فيها دلوقت دى..

 
At 12/04/2006 8:54 AM, Blogger Shaimaa Zaher said...

إزيك يا باسم..

عندك حق كله بقى عادي ومفيش حل

بس كله إلا الهجرة ..مصر محتجالك وكده!

سلام :)

 
At 12/04/2006 4:56 PM, Blogger باسم شرف said...

تامر
اشكرك عزيزي ويارب نلاقي السمين مش الثمين عشان نشبع
..............
تفاصيل
تشرف وتنزر مصر دايما
ووجودك ياعم مش عادي
.................
كراكيب
اشكرك واللي انتي قلتيه طبعا مش عادي لانك كتبتيه عن اشياء عادية فهذا غير عادي
وقشطة
.....................
تامر االشاعر
ربنا يخليك يامعلم وسؤال ايه نوعية البيبان اللي في العقول ههههه
قشطة ياعم
...............
me
اشكرك ياستي علي كلامك الجميل
واوعدك اني مش هحبكها خالص ...
.............
دكتور مجدي الشافعي هنا ؟ مش مصدق
نورت ياجميل واكيد هاتفرج علي الفيلم طبعا وشكرا لمرورك الكريم
....................
نور
الكلام للاسف في حياتنا بقي زي السكوت
جربي في حوار مع صحبتك مثلا تقولي لبلب بدل الكلام ومش ضروري صحبتك خليها اي حد او اسمعي النشرة وهي منزوعة الصوت وتخيلي المذيع انه بيقول لبلب .. تفتكري هتفرق
وقشطة
...............
شيماء زاهر
الله يسلمك يا جميل
اشكرك
انا مش مهاجر متخفيش لاني قاعد علي قلبها البلد دي
علي فكرة انا قريت الموضوع بتاع الفنان التشكيلي عزت عبدالعليم مكتوب حلو قوي برافو
..................

 
At 12/05/2006 7:44 AM, Blogger طارق إمام said...

باسم
مشكلتنا اننا ول الوقت مش قادرين نصدق او نستوعب ان نا عاديين
و ان دي ف حد ذاتها ممكن تخلق جوانا تفاصيل مختلفة فنبقى مش عاديين لكن بأسلوبنا
متهيألي ده رهان الفن نفسه
لغتك العامية صادقة و كثيفة
يا أخي انت بتكتب كأنك بتتكلم و العكس صحيح و دي حاجة مش سهلة
الله ينور يا فنان

 
At 12/05/2006 4:08 PM, Blogger We2am said...

"Q"esh6a ahh..ana kont nset.ha deh :D
heyya a7'rha qesh6a fe3lan..

 
At 12/05/2006 6:46 PM, Blogger باسم شرف said...

طارق
ربنا يخليك والله انت اللي فنان وفعلا مشكلة الناس مش مصدقة انها عادية والله عادية
وكل المجتمع علي بعضه مش محسوب وفيه كل انواع الفساد
.....................
وئام
قشطة
..................

 
At 12/07/2006 11:39 AM, Blogger nour said...

انا خدت بنصيحتك و عملت كده ماهى مش طالبة وجع دماغ دى معايا فى كل الامتحانات لان اسمها نورا برضه..و احنا امتحانتنا ما شاء الله المادة الواحدة يومين كل يوم عشر ساعات مش ناقصة اعصابى تتعب دى امتحانات عايزة روقان شوية
ميرسى على النصيحة يا معلم

 
At 12/07/2006 11:42 AM, Blogger nour said...

على فكرة انا نسيت اوضح نورا دى واحدة معايا فى الكلية تعبالى اعصابى هى منتقبة ماشى مقلناش حاجة بس هى معتبرانى علشان مش محجبة انى منحلة او حاجة و بتعاملنى على اساس كده بس انا قلت اوضح

 
At 12/07/2006 7:48 PM, Blogger باسم شرف said...

نور
والله معاكي حق .. الناس دي انا مبقدرش اقعد معاها اكتر من ثلاث ثواني واهرب منها مابالك لو كانت منقبة .. انا مش معترض علي النقاب بس انا مش بستريح للي بيلبوسه وبتخض منهم .. الله يكون في عونك

بس انتي دايما بتنوري المدونة بزيارتك

 
At 12/08/2006 5:24 AM, Anonymous Anonymous said...

عزيزي باسم
أظن قدامي شوية وقت على مااقدر أهضم أسلوبك فهو تنويعة غريبة بين الكلام السهل الخفيف وبين بعض التعبيرات الشعرية المفاجئة ، والنص كله استهانة بكل شئ وعلى رأس ماتستهين به الكلمات نفسها وهو أمر محير فعلا ولكن تعليقات أصدقائك وإيفيهاتكو تدل على حالة من التواؤم والتوحد مع هذا الأسلوب ، طبعا أنا مش بتكلم كأني من كوكب تاني ، لأ أنا بمشي ف شوارع وحواري وأزقة القاهرة وبعيش كل الأزمات ، بس يمكن علشان أكبر منكم شوية أو شويتين فإحساسي بالأمور مختلف . أحييك كثيرا وخلينا على تواصل مستمر

 
At 12/08/2006 7:54 PM, Blogger باسم شرف said...

الاستاذ عماد غزالي الشاعر الكبير
اولا احب ان اقول انك نورت المدونة البسيطة دي

ورايك ليس مختلفا ولا بعيد ما اكتبه هو ما احب ان اكتبه وهذه الموائمة بيني وبين متابعين المدونة هذه من قبيل الحياة التي تجبرنا علي عيشها وما نفعله مجرد حيل لكي نكون

الاستهانة بالكلمات وبالافكار ليست استهانة ولكن مجرد ما اشعر به من هزيمة القالب الجاهز للكتابة داخلي والبحث عن معادل لكلماتنا فقط
علي العموم اشكرك جدا لتعليقك

 
At 12/12/2006 2:51 AM, Anonymous Anonymous said...

احلى ما في الحياة بساطتها وتفاهتها بنفس الوقت :)))
وعنا مقوله بتقول طنش تعش تنتعش
يعني نفض وعادي
:)))
بساطة اسلوبك بتشدني اني اكمل قراءة البوست
:))

 
At 12/12/2006 9:34 AM, Blogger باسم شرف said...

عاصف
هو اسم عاصف مش هو مدونة نور ؟
انا لما دست علي اللينك بعتلي مدونة نور .. مش عارف ؟

علي العموم ميرسي جدا للزوق الجميل .. ممكن ننفض لحد ما نتنفض احنا منها
وقشطة

 

Post a Comment

<< Home