اللقاء الاخير مع حسين الشربيني

ويرحل الفنان حسين الشربيني ..

حسين الشربيني من الفنانين اللي كنت بفضلهم كتير في التمثيل لان كان عنده طريقة في الضحك غريبة جدا
وكان من المفترض انه يمثل معانا في تامر وشوقية اللي كتبينه وناضلنا كتير انا وحماد وتامر عشان نجيبه لكن عمرو قلنا انه تعبان وصحته مش مسعداه علي الشغل
لحد من فترة قريبه كنت بقرا جريدة قديمة ودي عادة عندي اقرا الصحف القديمة لقيت حوار كان مع حسين الشربيني وعرفت انه تعبان جدا لكن اللي ضايقني جدا في الحوار وحز في نفسي لما الصحفية سالته تحلم بايه دلوقتي يا استاذ حسين وانت بقي عندك سبعين قالها قولي واحد وسبعين ( يضحك ) وكمل كلامه وقال احلم انك تكلمي الاستاذ اشرف زكي يعملي معاش انا كبرت يابنتي ومبقتش قادر انزل اشتغل انا بقالي اربع سنين مبشتغلش
للدرجة دي خلاص الاستاذ المبجل اشرف زكي مش عارف يطلع معاش لفنان زي حسين الشربيني
معلش الايام دول

وجت الفرصة عشان احقق حلمي في اني اشتغل مع حسين الشربيني المفروض انه في مشروع فيلم قصير كتبته من فترة والمفروض برضه ان تنفيذه قرب ان شاء الله وكان اللي مرشح في الدور ده حسين الشربيني واتفق معايا كل اصحابي والمخرج بس كان الاعتراض كان علي انه مش هيوافق عشان تعبان انا قلت هاكلمه وان شاء الله هيوافق لاني مقتنع جدا بيه في الدور ده وكانت كمان عينيه بلونها بتعكس حياة البطل وادءه وسنه وتجاعيده .. وقلت علي بركة الله وقلت هاكلمه بعد كام يوم من رمضان عشان اطمن عليه واعرض عليه الامر وقالي ساعتها طارق امام انا هاجي معاك اطمن عليه برضه ... علي فكرة معظمنا بنحبه .. لكن اعتراضه علي الدور مكنش عشان تعبان لكن عشان مات .. وموته منعني اني احقق حلمي في انه يمثل حاجة كتبتها وكان هذا الانتظار الاخير في حياة حسين الشربيني مع حلمي
اتمني انه يكون مزعلش عشان متصلتش قبل رمضان