Thursday, April 19, 2007

محاكمة جزمة في ميريت يوم الاربعاء القادم


مناقشة جزمة واحدة مليئة بالأحداث
بدار ميريت
يوم الاربعاء 25 - 4 القادم
الساعة السابعة
واللي مش عارف مكان دار ميريت هي في شارع قصر النيل بجوار مسرح قصر النيل بالتحرير
وطبعا كانت هناك مناقشة لنفس الكتاب في مكتبة مبارك من اسبوعين وكانت ندوة جميلة انا اتبسطت منها جدا وقلما انا انبسط من ندوة اصلا لان كل الحضور كان قارئ للكتاب ولديه رؤية ومفيش كلام عن الدنيا ولا الحياة زي ندوات كتيرة
وكمان كانت ندوة العزب امبارح حلوة وكان الحضور كويس وكلهم برضه كانوا قارين الرواية
ودي حاجة بتفرح الكاتب جدا لما يلاقي حد يناقشوا في عمله بما هو موجود داخل العمل
وطبعا الشكر لكل الحضور واللي هيشرفوني بوجودهم يوم الاربعاء القادم
والكاتبة شيماء زاهر كانت كاتبة عن الندوة اللي فاتت في موقع بص وطل
وقالت :
"جزمة واحدة مليئة بالأحداث"...عندما يطول الانتظار دون جدوى!

عقد في مكتبة "مبارك" ندوة لمناقشة النصوص المسرحية للكاتب الشاب "باسم شرف" والتي تحمل عنوان "جزمة واحدة مليئة بالأحداث"، أدار الندوة الكاتب "تامر عبد الحميد" وقام بمناقشتها الكاتب "طارق إمام".
بداية قام "باسم شرف" بقراءة بعض من نصوصه المسرحية، ثم فتح باب المناقشة للحضور الذين قاموا بتحليل النصوص وفقا لرؤية كل منهم لها، فمثلا وصفت الكاتبة الشابة "نهى محمود" المجموعة المسرحية بأنها أشبه بـ"قراءة فنجان القهوة" تتعدد التفسيرات فيه وفقا لمنظور الرائي، وأضافت أن النصوص المسرحية بها تتسع لتكوّن عوالم منفصلة، تماما كما هي الحال بالنسبة للأعمال للقصصية التي تحولت فيما بعد إلى أفلام سينمائية.
كما ذكر السيناريست الشاب "محمد حماد" أن المجموعة المسرحية لا تندرج تحت المسرح التقليدي، فهي لا تحوي شخوصا وأبطالا بالمعنى المتعارف عليه؛ فالأفكار في المسرحية البطل الرئيسي، كما أن المشاهد يمكن إعادة ترتيبها حسب رؤية المخرج.
وردا على مداخلات الحضور، أكد الكاتب "طارق إمام" أن المجموعة المسرحية لـ"باسم شرف" "جزمة واحدة مليئة بالأحداث" تنفتح على أنواع أدبية مختلفة، كشعر النثر، كما تتميز بالتكثيف والتجريد الذي يجعل الكاتب غير مهتم بتحديد ماهية الأبطال، قدر انشغاله بالأفكار، والتعبير عنها.
وأخيرا، ذكر الكاتب الشاب "باسم شرف" أن مجموعته المسرحية كانت محاولة منه للتجديد والخروج على الأنماط الثابتة في الكتابة. وذكر أن فكرة الانتظار التي تطرحها المسرحية ما هي إلا انعكاس للواقع الذي نعيش فيه، فقد أصبحنا مجتمعا ينتظر كل منا فيه "المهدي المنتظر" كما تقول أحد النصوص المسرحية، ويكمل:
كل واحد فينا مستني حاجة... اللي مستني فلوس تيجي له عن طريق مسابقة زيرو تسعمائة في التليفزيون، واللي مستني ضربة حظ تغير حياته، واللي مستني واحد صاحبه عشان يحكي له حاجة، كل واحد فينا بقى مستني حاجة تحصل، وفي رأيي إن الانتظار دائما بيكون موجود في المجتمعات المتخلفة لأن ماعندهاش إرادة تعمل اللي عايزاه، دايما مستنية "مهدي منتظر" يغير الكون، وأنا في المسرحية باقول إنه مش جاي"..
وبكلمات "باسم شرف" عن المجتمعات التي تفتقر إرادة لتغيير الواقع، انتهت الندوة التي جاء أكثر ما يميزها التفاعل بين المنصة والحضور.
"جزمة واحدة مليئة بالأحداث" صدرت عن دار ميريت منذ عدة أشهر، وحققت معدل مبيعات غير معتاد في النصوص المسرحية، لذا فمهما تعددت الأراء النقدية حول المجموعة، فإنه يحسب لها أنها أعادت القارئ العادي إلى المسرح بكل ما فيه من زخم فكري وإبداعي، وهو ما يُحمّل "باسم شرف" مزيدا من المسئولية في نصوصه المسرحية القادمة

23 Comments:

At 4/19/2007 12:57 PM, Blogger Mirage said...

للأسف الشديد .. انشغلت بامتحاناتى وفاتتنى الندوة الأولى .. لكن بإذن الله هأحاول أحضر الندوة التانية ولو إن ميعادها متأخر بالنسبة لى :(

ألف مبروك مرة تانية باسم
ويا ريت لو فيه تصوير للندوة مرفوع على النت تبلغنى بوصلته

****

عجبنى جدا تشبيه نهى محمود بإن المجموعة اشبه بقراءة فى فنجان قهوة .. فقد حيرتنى بعض النصوص أيضا وشغلتنى أياما لفك طلاسمها

***
لا أعد حقا بالحضور لكنى أتمنى لو استطعت :)

 
At 4/19/2007 9:23 PM, Blogger باسم شرف said...

عزيزتي ميراج

تحية لكي علي اهتمامك بالعمل وهذا يسعدني كثيرا

وياريت تيجي لو حتي تقولي رايك وامشي

للاسف متصورتش فيديو لكن اتصورت فوتوغرافيا فقط
وعايز اقولك ان انا اتبسطت كتير في الندوة اللي فاتت وكنت هزداد سعادة لما القيكي موجودة واكيد انتي جاية الندوة اللي جاية ان شاء الله

تنوري يا افندم

 
At 4/20/2007 2:14 PM, Blogger 21arestoo said...

اولا انا للاسف مقدرتش اجي اللقاء اللي فات بتاع مكتبة مبارك
لكن ان شاء الله هاحاول اكون موجود يوم الاربع ولو انه رغما عني يوم عيد ميلادي

ثانيا بقى والاهم
مجموعتك المسرحية شاهد مقنع جدا على انك راجل فنان

لعل جزمة واحدة تملأ الفراغ الذي تركه شكسبير وغيره

هكذا كتبت أنت كإهداء لصديقي الذي قرأت كتابك من خلاله ولعلي مقتنع بغرورك المبرر



اه على فكرة المهدي المنتظر مش جاي

تحياتي يا فنان

 
At 4/20/2007 4:44 PM, Blogger ahmedwael said...

معلش يا باسم الحظ ماحالفنيش اني ااجي ندوه المكتبه ونفس الحظ ماحالفنيشاني اجيندوه دار ميريت
عشان ظروف العرض بس بجد الكتاب مش محتاج لندوه ولا اتنيين ولا تلاته
ده عايز زمن كبيير اوي عشان نقدر نخلص الكلام عنه
تحياتي ليك

 
At 4/20/2007 8:20 PM, Blogger باسم شرف said...

عزيزي ارسطو
اولا كل سنة وانت طيب
ثانيا اشكرك علي اهتمامك بالمجموعة وكلامك الجميل عنها
ضحكت جدا علي اقتناعك بغروري المبرر ماشي ياعم ارسطو

وهو فعلا المهدي مش جاي

..............................
احمد وائل
ربنا يخليك يامعلم وانا هاقعد بقيت عمري اناقش الكتاب ؟

قشطة

 
At 4/21/2007 12:59 PM, Blogger Shaimaa Zaher said...

ندوة مكتبة مبارك كانت هايلة بجد...إللي بس كان مضايقني صورة الزعيم وراك علاطول..بس ما باليد حيلة.. إلى الأمام كده يا يارب و إن شاء الله أحضر ندوة يوم الأربع كمان
تحياتي

 
At 4/21/2007 5:24 PM, Blogger iHaB said...

ابو باسم
انا حضرت الندوة الأولى وفعلاً كانت ندوة واضحة لأن الحضور كانوا بيتناقشوا فى صميم المجموعه ..وانشاء الله آجى الندوة الجاية ..للمرة المليون بقولك ..المجموعه خطوة جريئة ومهمة ..شكراً للمجموعه وشكراً لأهتمامك بمناقشتها

 
At 4/22/2007 5:58 AM, Blogger soha zaky said...

أزيك يا باسم مبروك النجاح المبدئى لمسرحيتك وانشألله تكون ندوة ميريت أشد من مبارك طبعا انشألله

 
At 4/22/2007 7:08 AM, Blogger باسم شرف said...

شيماء زاهر

اشكرك جدا علي تغطيتك للندوة وحضورك وكلامك عن المجموعة

ان شاء الله هتنوري الندوة

 
At 4/22/2007 7:09 AM, Blogger باسم شرف said...

هوبا الجميل

انا سعيد بحديثك عن المجموعة ونورت الندوة وهتنور اللي جاية

 
At 4/22/2007 7:11 AM, Blogger باسم شرف said...

سهي هانم زكي

ميرسي جدا يا افندم وان شاء الله هتنوري الندوة

ودايما الندوات بتبقي حلوة بالحضور الجميل من الناس وخصوصا اللي بيعرفوا يقروا كويس

 
At 4/22/2007 8:07 AM, Blogger bastokka طهقانة said...

جميلة قوي الروح دي

حشتري الرواية و استمتع بيها معاكم

 
At 4/22/2007 2:46 PM, Blogger شيمـــــاء said...

تفتكر هتفرق عن ندوة مبارك كتير
يعنى الكلام اللى هيتقال هيختلف

معلش من خارج الوسط و معرفش

 
At 4/22/2007 2:47 PM, Blogger شيمـــــاء said...

نسيت اقول ان ندوة مكتبة مبارك فعلا فرقت معايا فى قراية المجموعة تانى

وخلتنى التفت لحاجات كتير

بس برضه
ازازة و كراكيب من افضل النصوص و على راسهم المهدى المنتظر

 
At 4/22/2007 8:07 PM, Blogger باسم شرف said...

عزيزتي طهقانة

اشكرك علي كلامك الجميل وحماسك
بس عايز اقولك انها مجموعة مسرحية مش رواية
وتتعوض المرة اللي جاية ونكتب رواية عشان خاطرك

 
At 4/22/2007 8:10 PM, Blogger باسم شرف said...

عزيزتي شيماء

سعدت كثيرا بحضورك الندوة بتاعة مكتبة مبارك

مش هتفرق في ايه بس اللي ممكن اقوله انا نفسي ممكن اقرا نص بطريقة جديدة واستوعبه كقارئ بطريقة

ويمكن كمان النقاط اللي وضحها طارق وتامر وحماد وباقي الحضور تجعل الجميع يقرا بطريقة مختلفة وهذا ما حدث معك بالظبط كما اشرتي من قبل وهذا ينطبق علي كل الاعمال العربية او العالمية

علي العموم تنوري وتعرفي الفرق
والقطنة مبتكدبش

 
At 4/23/2007 4:28 AM, Anonymous Anonymous said...

و الله كان نفسى أحضر أى ندوة ؛بس ما باليد حيلة
ألف مبروك و انا قلتلك ان كتابك ده تحفة بجد و عجبنى جداالنص المسرحى
وكمان أفلة كل مشهد بالاظلام التام أو المفاجىء

 
At 4/23/2007 6:27 AM, Blogger Dalia Ziada said...

باسم الجميل

سامحني السياسة خدتني كتير و حرمتني من زيارة مدونتك الرائعة بانتظام زي ما كنت بعمل دايما و حرمتني من حضور الندوة اللي فاتت على الرغم من تشوقي الشديد لحضورها

علشان كده أكيد مش هفوت فرصة حضور الندوة القادمة في ميريت إن شاء الله

ربنا يوفقك و يزيدك

 
At 4/23/2007 6:46 AM, Blogger nour said...

بااااااااااسم
مش هقدر اقولك انى جايه اكيد
بس ححاول
و الله العظييم عايزة اااجى
يا رب اعرف اجى:(((

 
At 4/23/2007 7:52 AM, Blogger باسم شرف said...

رانيا
يكفي اهتمامك باقتناء الكتاب كما اعرف انك مش موجودة في القاهرة ودا شئ يشرفني طبعا
وشكرا علي كلامك الجميل علي الكتاب

 
At 4/23/2007 7:55 AM, Blogger باسم شرف said...

الانسانة الجميلة داليا زيادة

الله يكون في عونك .. السياسة بتعلم النسيان ههههه انا اعرف تقديرك واهتمامك البالغ واشكرك طبعا

واتمني اني اشوفك يوم الاربعاء في الندوة

خدي بالك من السياسة الكتير بس

 
At 4/23/2007 7:56 AM, Blogger باسم شرف said...

عزيزتي نورا الفنانة

بالطبع اعرف ظروفك .. وان شاء الله هتعرفي تيجي المرة اللي جاية

اشكرك علي الاهتمام

 
At 4/25/2007 9:29 AM, Blogger خواطر شاب غاضب said...

صباح الفل يا بسوم
انما فاروق الجمل ودي مدونتي اتمني انط تزروني بقي ا باشا

 

Post a Comment

<< Home