مسلسل الجماعة .. بقي مع الجماعة

يوميات مع الجماعة

.............................

مسلسل الجماعة تقريبا كل الناس اتكلمت عنه .. يمكن ده نجاح ليه وللاخراج الكويس والصورة الرائعة الممتعة بصراحة وفكرة تقديم مسلسل عن شخصية حسن البنا فكرة برضه عجباني . عشان نبعد شوية عن تقديم شخصية الفنانين لان فيه علماء ومفكرين مهمين نختلف معاهم او نتفق بس المهم انهم كيان لكن هنقضيها ممثلين بس انا شخصيا زهقت جدا من المسلسلات دي ومبقتش اتفرج عليها . يمكن انا مبحبش الاخوان ومبحبش طريقتهم في السلوك الديني والسياسي لكن ما قدمه وحيد حامد يحتاج لبعض الكلام ... ما كتبه وحيد جاء لصالح الاخوان وليس ضدهم كما يتوقع وحيد حامد وهو في صدده للمسلسل وخصوصا اننا عارفين موقف وحيد حامد منهم .. اولا من حيث البناءاشتغل وحيد حامد علي مستوين من الزمن .. اولا الزمن الحالي وهو من خلال تحقيقات نيابة امن الدولة السبع نجوم وتكرار كلمة جماعة محظورة كل ثلاث ثواني وطريقة حوار مريحة جدا مع المدانين من الاخوان المقبوض عليهم .. يمكن في نيابة امن الدولة مش بيحصل ضرب او اهانة بالشكل الكبير لكن بيحصل في السجون لكن برضه من مش بالشياكة دي وخصوصا ان وكيل النيابة اللي بيحقق ناس اقل منه كتير في المستوي الاجتماعي والتعليمي والسياسي ورغم كده بيقابلهم بشياكة وزوق لكن كلنا عارفين طبيعة الشخصية المصرية لما ربنا بيديها اول حاجة بتعرف انها في مستوي والباقي في مستوي ...المستوي الزمني التاني هو تاريخ حسن البنا اللي اعتمد فيه وحيد حامد فيه علي لغة فصحي في اغلب الاحيان علي شوية عامية وحوار مش شبه الشخصيات .. والمعروف ان شخصية حسن البنا فلاح يعني المفروض انه يتكلم بلهجة فلاحي حتي لو بالفصحي مش بالقاهري وشخصية حسن البنا لعب بيها لعبة درامية اقرب للتعاطف والتضامن وهو فكرة الرحلة .. رحلة الشخصية من البداية الي النهاية حيث جاءته فكرة الدعوة وبدا يدعو في القهاوي .. اولا الاخوان مش بيدعو .. لان دي جماعة تانية اسمها الدعوة والتبيلغ .. اما جماعة الاخوان بينشروا افكارهم بطريقة تانية انهم يعملوا رحلات ويعزموا ناس تيجي مع اصحابها او دوري كورة او يتمشوا شوية ويشربوا عصير بيدعي من خلال تفاصيل اغلبها ليها علاقة بالرفاهية والمزاج ياخدوهم يلعبوا كارتيه في الجنانين او يلعبوا بينج بونج المهم انك هتلاقي كل واحد بيجيب واحد ويلعبوا ويتقبلوا في الجوامع يتكلموا في اي حاجة لحد ما الشخص يتالف وياخد علي الجماعة وبقي واحد منهمانما اللي قدموا وحيد حامد فيه خلط شديد بين الجماعات الدينيةوبينجح حسن البنا بملابسه البيضا الجميلة والشخص الوسيم الذي احبته النساء وتنتظره كل يوم ليشاهدوه والرجال ايضا احبوا شخصية الشخص الطموح .. الذي يسعي لتقديم الدعوة ... لحد ما بقي بيقول كلام للناس اللي معاه وحلول ساذجة جدا فاللي حواليه الله او ماي جاد .. انك لذيذ يا شيخ حسنيعني مثلا حبوا يبنوا جامع في ارض فاضية فبدا وقال الارض جميلة وتصلح للجامع علي بركة الله ثم امتعض احد الواقفين فقال له حسن ماذا بك ؟ قال له لان البيت اللي جنب الجامع بيت دعارة وفسوق .. فرد الجميع اه صحيح مش هينفع يا شيخ حسن .. فصمت حسن للحظة ثم قال مش بيت دعارة هو اللي هيخلينا نمشي وبيت ربنا مش يتبني هما اللي هيمشوا .. نظر الجمع لبعضهم البعض ثم اكدوا علي ذكاء حسن البنا وفكه وفطنته ..

المهم ان وحيد حامد حب يعمل مسلسل ضد الاخوان طلع مع الاخوان ودي النكتة اللي قلبت علي صاحبها.

.....................................................

وبعد مرور عشرين حلقة بقي عندي اسئلة

وبعد ما شفت الحلقات لغاية 20 بقي فيه حاجات غريبة بتحصل في المسلسل ده وبدور عليها .. هل الاخوان في بداية التنظيم كان ليهم علاقة بالسلاح ؟ كان ليهم جيش علني ممثل في شكل الكشافة وهناك جيش سري ؟ وهل العلاقة كانت قوية بالفعل مع علي ماهر والملك

اكتشفت النتيجة اه طبعا ده حقيقي ...

....................

بعد ان تجاوز المسلسل الحلقة الخامسة والعشرين قعدت افكر في خطة المسلسل الدرامية لقيت وحيد حامد عمل خطة في منتهي الصياعة ... كلنا كتبنا ان المسلسل بقي مع الجماعة وشكينا في قدرة وحيد حامد الدرامية هل هو ساذج لهذه الدرجة ان يتورط في كل هذه المشاكل السطحية ولكنه كان اخبث دراميا ...

يعلم وحيد حامد ان المجتمع المصري له بنيه دينية واي حد هيقرب من المساس باي شخصية دينية بيتم القضاء عليه بمنطق مش هنتفرج عليه دا سخيف ويبداو يتكلموا عليه في خطب الجمعة ويتبهدل .. خلاهم عادي حابين الشخصية وبعدين بدا في تعقيد الشخصية وخرجها من شكلها الديني ولبسها عباية سياسية وارهابية بمنتهي السلاسة .. وبقي المسلسل ضد الجماعة كليا وجزئيا

علي الرغم اني مقرتش في تاريخهم ارهاب بهذه الصورة الا اني لسة بدور علي حقائق معينة يمكن عشان انا مش بحب الاخوان لكن بحاول اقراهم بمنطقهم شوية ... بس مظنش ان الاخوان معنهموش ارهاب واسلحة وجيش بالشكل ده ... ده ممكن يكون عند جماعة اسلامية تانية الجهاد في سبيل الله

واكتشفت في الاخر ان مسلسل الجماعة احسن مسلسل في رمضان

..................................................

باسم شرف