Thursday, March 12, 2009

كليك شمال للشاعر عادل سلامة



مصر أجمل مطربة

مصر اجمل مطربة

صوتها كان مالى الرداوى

فى القهاوى وفى الحارات

كل حتة بتمشى فيها بتلاقيلها بوسترات

نجمة جامده مافيش كلام

ع المسارح .. واقفه وقفه فيها عزة وانسجام

كل كل المطربين كورس وراها

تفتن العشاق بأهه

تاخد الاحساس معاها

واما تسكت لحظة بتقوم القيامة

تبتسم نص ابتسامه

تبتسم كل الاماكن

تندمج وعنيها تلمع

تلقى كل الدنيا تدمع

هى جاية الدنيا بس عشان تقول والباقى يسمع

هى فين راحت صحيح

ماتت .؟. ماظنش مستحيل

قررت فجأة اعتزالها؟

برضه لأة .. مش ده حالها

طب وفين جمهورها راح

من زمان ماسألش عنها

اختفاءها فجأة بيخليها عرضه للإشاعة

والخبر مالى الجرايد والمواقع والشاشات

من ييجى ساعة

ليه ماجتش بنفسها علشان تكدب كل ده

حد عنها يقول كده؟

ايه شعورك لما كل الدنيا دى تقراه معانا

اقرا شوف

مصر حصريا توقع مع روتانا" "

....................................................

من ديوان كليك شمال
للشاعر الموهوب عادل سلامة
دار ملامح





5 Comments:

At 3/12/2009 1:33 PM, Blogger حسام غانم said...

جامدة جدا جدا جدا

شكرا للنقل

 
At 3/12/2009 5:14 PM, Blogger dodda said...

المهم العقد بكام والبحبوح حيدخل فى حساب سويسرا بأسم مين؟؟؟

كيفك يا فندم؟؟؟

 
At 3/28/2009 11:29 AM, Blogger نسرين حمدى said...

عادل سلامة شاعر موهوب و أنسان جميل

 
At 4/07/2009 1:08 AM, Blogger ياسمين نعمان said...

مدونة حضرتك جميلة .. قابلتها بالصدفة وان شاء الله هتابعها..
شعر جميل فعلا ..
و المشكلة مش بس اختفاء .. المشكلة في ناس ألحقوا بيها العار والمهانة بسبب مواقفهم السيئة اللي بتتاخد بإسمها وهي منها بريئة

 
At 4/07/2009 6:15 PM, Blogger باسم شرف said...

حسام باشا
منور يا معلم

دوددة
اظن بعد ازمة البورصة الامر هيختلف
انا كويس يافندن
كيفك انتي

نسرين
طبعا وصديق من سنيييييييييييين طويلة


ياسمين
ربنا يخليكي انا اللي سعيد بزيارتك ويارب ما تتقطع
وطبعا قصيدة عادل فوق الهايلة

 

Post a Comment

<< Home