Tuesday, February 27, 2007

فلاش الكاميرا يكشفك .. قصة قصيرة



فلاش الكاميرا يكشفك

راوي يكشف البطل

اجندة

أجندتك الكبيرة المطبوع عليها عام 1979 التي حصل عليها والدك من الشركة التي يعمل بها .....
حفظها (الكميدنو( لفترة كبيرة و انتقلت لك بعد عشرين عاما بفعل الزمن لأنك قد دخلت الجامعة ..
نقلت فيها أشعارا رومانسية لم تكن لك ،
واخترت فتاتك الجميلة وتحكي لها عن سبب تأليف هذه الأشعار
وتحكي أيضا عن الفتاة التي أحببتها من قبل واستمر الحب تسعة أعوام ......
يا لها من فاجعة تظهر في عين الفتاة وأنت تحكي ..
عادة ما يتصادف وجود هذه الأجندة معك عند لقاء الحبيبة ( أتيت بها عمدا )
وبعد فترة صدقت أن هذه الأشعار ملك لك .
هل تعتقد أن هذه الأجندة ملك لك ؟ ..

..................................


قطة

حكيت لها عن قطتك الشقية التي كنت تربيها في المرحلة الثانوية ،
و ماتت فجأة
حزنت لفراقها كثيرا ، فلقد ضاع معها مفهوم الصداقة .
( لم يكن له قطة أبدا لأنه لا يحب الحيوانات ) .

.......................................

حبيبة

تجلس عند الجانب الأيمن من كافتريا الأندلس وراء مكتبة جامعة القاهرة مع فتاة ما
وتحكي لها عن عذرائك المسكينة التي ارتبط بها وماتت .

وفي العام القادم

تجلس وحيدا وراء المكتبة وتمر بك فتاة ما أيضا تسأل عن سر حزنك الدفين لتقول لها : كانت حبيبتي ولكنها ماتت . ( صارت الكذبة جزءا من ملامح وجهه وجزءا من تفاصيل حياته اليومية ).


..............................
باسم شرف
تم التقاط الصورة للمثل الجزائري احمد عوني عندما كنت ادرس بتونس 2005

Thursday, February 22, 2007

تاريخ مواطنة قصة قصيرة

قصة ، من : محمد حسين بكر
48
مصر... الملكية
جدى يرسل الى " أخوالى " روحــه مع شاويش صديق له يدعى " فراج " كانت السحــرة تأكـل صدر جدتى .. أما أكبادها " أمى وأخواتها " فكانوا يمضغون الصمت ..
ربما وقتها أيضا ، كان عبد الحليم حافظ يتشاجر مع آخــريـــن
" بالملجأ " !! وحتى نضع – الأمور فى نصابها – لا أدرى أين كان عبد الوهاب ، وأن كانت أمى وقتها تحب نعيمة عاكف .. فى " أربع بنات وظابط " ؟!

- 2 -

52
مصر ... الجمهورية
خالى " عبد الله " صار صحفيا .. ويكتب عن آمال الثورة .. كان عندما يتحدث مع أحد من إخوته يخرج علبة سجائر ذهبية
اللون .. فيتذكرون على الفور علاقته الوطيدة مع " ناصر " و" الشيخ الباقورى " .
كانت أمى .. صغيرة وقتها .. تمتم خالى " عبدالله " وإنت يا هانم " فيه مطرب جميل جدا .. سيغنى الليلة اسمه عبد الحليم قد تخرج .. وبدأت أولى خطواته على سلم الموسيقى .

- 3 -
56
مصر ... الجمهورية
كانت أمى حاملا فى أخى الاكبر " فتحى " وأبى .. يصرخ وراء الإضاءة الــتى تــنير وجــــه عبد الحليم حافظ .. وهـــو ( يشعلها نيران) بموسيقى ملتهبة ويصفق بكل قوته .. صارخا خلفه ( إيييه ) وقد قال " حليم " وقتها ..
إخواانى ..
انتقل خالى وقتها للكتابة فى جريدة " المساء " ؟! .. وابتاع لأخته راديو جديدا صورة أخى فتحى بالشورت الكمونى واقفا عليه ( دليلى فيما أقول ) ؟

- 4 -
67
مصر ... المتحدة
اختفى خالى " عبد الله " وراء الغيوم بعد سلسلة من المقالات بدأت أمى تذبل من كثرة الخلفة .. وانحنى عود ابى وهو واقف أمام المجمع الاستهلاكى .. ويتأفف .. كان خالى " عبد الله " يغدق على إخوتى بالنقود ..
كان " فتحى " قد تخلى عن فكرة أبوة ( عبد الناصر له ) .. كانت المحلة لها فريق قوى .. وكان يتابع مبارياته على مقهى الصعايدة وكانت " أختى " فايزة تعلق شارة حداد سوداء على المريلة وحمدى أخى صاخب .. وصلاح الوسطانى يهرب كثيرا من المدرسة كان ابى كذلك يبكى .. وقــد أطفـــــىء نور
المسرح وكان عبد الحليم مريضا وشاحبا وهو يغنى " عدى النهار " .. والمغربية جايه " بعد أن نام السلاح .

- 5 -

73
مصر ... العلم والإيمان
أمي تقوم بتوصيل الخبز إلى السويس وبعدها فى يوم 31 يناير 74 .. كنت أنا أبكى صارخا وأخوتي .. فرحون بوصولي لمحطة الدنيا .. كانت " فايزة " مصدومة لقد أخبرتها القابلة بكونى بنتا ، إلا إنني .. كنت ولدا ؟! وكانت هي متوجة بتاج البنت الوحيدة .. كان أبى فخورا بمولدي .. لم يسمني ناصرا .. بل أسماني " محمدا " !!
وكان عبد الحليم يغنى .."عاش اللى قال عدو القنال ..عااش "

- 6 -

؟
مصر ... الآن
أجلس على المقهى .. محاولا فك طلاسم روحي .. " محمد " أبن أخي " فتحى " يغنى " بابا فين " !!
مازلت أرتب تاريخي .. محاولا فض الاشتباك بين وجه أبى ووجه " حليم " فأجد صعوبة فى ذلك ..
أعود .. لتسألنى أمى .. " أخوك صلاح .. هيرجع أمتي من الخليج يا محمد؟ .." أتابع النشرة حزينا مغموما هل سيقصفون بغداد حقا ؟ ، أغنى .. " فوق الشوك مشاني زماني " ..
علي فكرة نسيت اقول
ان محمد حسين بكر مات
وعلي فكرة الناس اللي زعلانة من اني بكتب هنا اخبار ناس بتموت فدا مش ذنبي دا ذنب اللي قرر انه يموت .. عبث قوي ان حد يزعل لاني بكتب عن ناس بتكسر حاجز الملل اللي عايشنه فبتموت .. علي فكرة هما صح...
لكن ليا ملحوظة ليه كتاب شباب كتير بتموت الايام دي ؟
وعلي فكرة برضه نسيت اقول ان الموت ابن الزمن .. عشان كده نسقفله ونحط دماغنا علي ايدينا وننام وهتفضل الناس تموت .. لحد ما تبقي عادة وساعتها نفتكرهم قوي
وداعا محمد حسين بكر
واللي خفت اكتبه هنا
وهنا كمان

Saturday, February 17, 2007

وقوف متكرر


وقوف متكرر
عنوان عجبني جدا للروائي محمد صلاح العزب
ودي رواية جديدة صدرت بدار ميريت
الرواية عجبتني جدا وفيه لغة سلسة وتقطيع الرواية لمقاطع قد تطول وقد تقصر زاد من حلاوتها
العزب من الناس اللي بيكتبوا حلوا قوي وبفرح لما بلاقي ليهم نصوص عشان اقراها
وروايته كانت من اكثر الكتب مبيعا بمعرض الكتاب
مع كتاب جزمة واحدة مليئة بالاحداث ليا طبعا ومع ديوان الشاعر ابراهيم داود حالة مشي وكتاب كلبي الحبيب كلبي الهرم للشاعر اسامة دناصوري ورواية ايثاكا للكاتب رؤوف مسعد
وكل الكتب دي صدرت من دار ميريت
وممكن تحصلوا عليها من الدار نفسها او من مكتبة ديوان بالزمالك او مكتبة مدبولي بوسط البلد
واماكن كتير انا معرفش مناطق التوزيع فيها لكن هتلاقوها ان شاء الله
علي فكرة العزب قضي معايا فترة المنحة بتاعة البحرين وكنا في غرفة واحدة وكان دايما بيشتكي من اني بعلي صوت التليفزيون وهو نايم ومكنش مقتنع من صوت نومه كان اعلي
تحية للمحمد صلاح العزب علي رواية وقوف متكرر

Sunday, February 11, 2007

تاج الملك

انا عادة بخاف من الاسئلة والاجابة وبحب اليحاة اللي ماشية من غير سؤال لانه بيحدد حاجات انا مبحبش احددها لكن لما جالي التاج ده وعلي فكرة انا مبعرفش في امور التاج ولا صفاته لاني اجهل تكنولوجيتكم
ولكني ماثل امامكم الان فلا تطيحوا بي فانا منكم واعيش
علي فكرة التاج ده جه من وئام
اية اللي حيحصل لايميلك لما تموت ؟
اكيد هيتقفل .. لان بعد عدة شهور سيعلن السيد ياهو انني لست من اتباعه وهذا لسبب انشغال الذين يحبونني بالحزن علي .. فسيحصل السيد ياهو علي ما يخصه والذي اعطاني اياه مجانا .. وهذا حقه


اديت الباس وورد لحد قبل كده؟
اكيد

و اه كانت طبيعة علاقتك بيه اية؟
اخويا لانه الوحيد الذي كان يتابع رسائلي الاليكترونية وخصوصا معرفتي القليلة بالتكنولوجيا من عام 1996 الي عام 2004

اسمك؟
باسم ابراهيم شرف
اسم الدلع المشهور في وسط اصحابك ؟
مش عارف كل واحد بيحاول ان ينحت اسم دلع لارضائي ويلقي دائما العكس لاني مبحبش الدلع

عمرك؟
حبة سنين تقدر بسبعة وعشرين عاما

برجك؟
ميزان
مجالك او مجال دراستك ؟
مجالي الحياة والسعادة لذلك عملت بالفن وخصوصا الكتابة

شخصيتك نوعها ايه؟
نوكيا 6610 بجراب واحيانا من غير جراب وعادة ما تتصدي الضعف




السفر بالنسبة لك ؟

تغير جو ودراسة فقط وليس من اجل الحصول علي اموال

المود بتاعك؟
سبعة الاف مود في اللحظه


وقت فراغك بتعمل فيه اية؟
ماهو لو عملت فيه حاجة بيقي مش وقت فراغ وانا بطبعي اميل الي الانتخة في البيت ومشاهدة التلفزيون

الاكلة المفضلة؟
الرز والبسلة والفراخ ( وجبة علي بعضها )

الصفات اللي خدتها من بابا؟
مش عارف او عارف وبستعبط

الصفات اللي خدتها من ماما؟
نفس الاجابة


اكتر 6 حاجات بتكرهها؟
الكذب
واللي بيعمل صحبي وهو مش صحبي
والتخلف
والغباء
والجملة المكتوبة غلط او وحش
والبنت اللي بتركب جنب سواق التاكسي
اكتر 6 حاجات بتحبها؟
لذة الاكل
وعدوي اللي بيخليني اشتغل اكتر من اللزوم عشان ابقي احسن وعادة ده عدو غبي لانه مش فاهم طبيعتي
الجملة اللي مكتوبة كويس قوي واستمتع بيها حتي ولو مكتوبة علي لافتة محل
اليوم اللي بدأ صح
متابعة المارة من الترام القديم
اشوف حد بحب اشوفه صدفة

الشغل بالنسبة لك؟
كل الحياة

الكومبيوتر والانترنت بالنسبة لك؟
انا في التراوة في الموضوع ده وبلاش احراج

وعشان كده عملت التاج اللي معرفش يعني ايه لغاية دلوقتي
سعدت بكم كما سعدتم بلقائي ولا ايه ؟ اكيد بدليل كملت معايا للاخر واشوفكم في حلقة جديدة وبرنامج تاج دوت كوم

Saturday, February 10, 2007

انا حابب اشكر

كم سعدت باصدار كتابي بشكل غريب وكأن العالم قد سعد ايضا معي

وسعدت اكثر عندما علمت من مجلة صباح الخير ان المجموعة المسرحية ( جزمة واحدة مليئة بالاحداث ) من اكثر الكتب مبيعا في معرض الكتاب وزادت سعادتي عندما توالت الاخبار بهذا في اكثر من مصدر اعلامي

لم اكن اتصور ان كتاب المسرح قد يصل ليد القارئ

يمكن بسبب ما عانيته في نشر هذا الكتاب والمقولة الثابتة
المسرح لا يبيع
هات رواية
او اكتب علي الكتاب مجموعة قصصية
وغير هذا بكثير

ولكن ميريت غامرت بالكتاب وبالتجربة والحمد لله اثبتت لكل دور النشر ان العمل يفرض نفسه والقارئ يحدد ما يحتاجه

لك الحق ان تختلف معي في كون القارئ ليس بحاجة للمسرح ولكن انا اري القارئ بحاجة لان يري ما يدور بروؤسنا عله يحدث تطهيرا او متعة

ليس هناك قالبا ثابتا للحياة
وهكذا في الفن

شاكرا لكل من اهتم بقراءة الكتاب
وشاكرا لكل من ساهم بكسر قواعد القراءة

هذا من اجل الحياة


ويارب تستمعتوا بجزمة واحدة مليئة بالاحداث

Thursday, February 08, 2007

معلش بقي

انا اسف علي التاخير لان البلوج كان فيه مشكلة والحمد لله حلتها وقريبا فيه بوستات ان شاء الله
وهارد علي التاجات اللي جت ليا علي الرغم انا مبعرفش ارد علي الاسئلة دي لكن عشان بعز الناس اللي بعتوه

...............................................................
عايز اقولكم علي حفلة هيعملوها جماعة ورقة وقلم يوم الحب او الفلانتين
يوم الاربعاء 14 -2 بمسرح الصوبة بحديقة الازهر الساعة الرابعة

اشوفكم هناك ان شاء الله
................................................................